سوال: السلام علیکم، مفتی صاحب ! نماز میں رکوع اور سجدہ میں کم از کم کتنی تسبیح ہے ایک ہے یا تین؟ نماز کی پہلی رکعت میں میں نے غلطی سے سجدہ میں صرف ایک ہی تسبیح پڑھی، جبکہ میں رکوع میں تین تسبیح پڑھ چکی تھی، پھر میں نے یہ سوچ کر دو سجدے تین تسبیح کے ساتھ کیے کہ آخر رکعت میں سجدہ سھو کرلوں گی، گویا کل تین سجدے ہوگئے، ایک سجدہ ایک تسبیح کے ساتھ اور دو تین تسبیح کے ساتھ اور آخری رکعت میں سجدہ سھو کرلیا، تو کیا میری نماز صحیح ہوگئی یا نہیں؟ براہ کرم جواب عنایت فرمائیں۔ جزاک اللہ خیراً

جواب: واضح رہے کہ رکوع یا سجدہ میں ایک مرتبہ ''سبحان ربی العظیم'' یا ''سبحان ربی الاعلی'' کہنے کی مقدار ٹھہرنا واجب ہے، اور تین مرتبہ ''سبحان ربی العظیم'' یا ''سبحان ربی الاعلی'' پڑھنا سنت ہے، لہذا اگر کسی نے رکوع یا سجدے میں صرف ایک مرتبہ "سبحان ربی العظیم" یا ''سبحان ربی الاعلی'' کہا، تو اس کی نماز ادا ہوگئی، سجدہ سہو یا سجدے کے اعادے کی ضرورت نہیں، البتہ رکوع یا سجدے میں تین مرتبہ تسبیح نہ پڑھنا سنت کے خلاف ہے۔
پوچھی گئی صورت میں چونکہ ایک رکعت میں تین سجدے کرنے کے بعد آپ نے سجدہ سہو ادا کرلیا ہے، اس لئے آپ کی نماز صحیح ہوگئی ہے، نماز دوبارہ پڑھنے کی ضرورت نہیں ہے۔