سوال: چند ماہ پہلے ہمارے علاقے میں ایک وبا سے مویشی ہلاک ہونا شروع ہو گئے تھے جس میں لوگوں کا کافی نقصان بھی ہوا۔ ہمارے گاؤں کے ایک عالم صاحب نے مغرب کے بعد لاؤڈ سپیکر میں سورہ تغابن کی تلاوت کا اہتمام فرمایا۔ اب وبا تو کافی عرصے سے ختم ہو چکی ہے، مگر مذکورہ سورت کی تلاوت بلا تعطل جاری ہے۔ دوران تلاوت کچھ لوگ نماز و تسبیحات میں مشغول ہوتے ہیں۔ ایسی صورت میں شریعت کے حکم سے مطلع فرمائیں کہ کیا طرز عمل اختیار کریں، تاکہ لاعلمی کے باعث ہم کسی گناہ کے مرتکب نہ ہوں۔

جواب: عام حالات میں دیگر سورتوں کی طرح سورہ تغابن کی تلاوت بھی باعث برکت اور سبب سعادت ہے، تاہم پوچھی گئی صورت میں اس طرح لاؤڈ اسپیکر پر اس کی قراءت کا مستقل التزام واہتمام کرنا درست نہیں ہے، کیونکہ حضراتِ فقہاءؒ نے ایسی جہری قراءت سے منع فرمایا ہے جس سے لوگوں کے مختلف معمولات مثلاً: کام کاج، نیند، نماز اور قراءت وغیرہ میں حرج واقع ہوتا ہو، لہذا اس سے اجتناب کرنا چاہیے۔ تاہم اگر اپنے طور پر کوئی شخص لاؤڈ اسپیکر استعمال کیے اور لازم سمجھے بغیر اس کو پڑھ لے تو اس میں کوئی حرج نہیں ہے۔