سوال:
السلام علیکم، مفتی صاحب! کیا بالوں پر سرسوں کا تیل رات کو لگانا سنت ہے یا کوئی بھی تیل لگا سکتے ہیں؟
جواب: احادیث میں رسول اللہ ﷺ سے سر کے بالوں پر تیل لگانے کا ذکر تو موجود ہے، لیکن اس حوالے سے صراحت نہیں ملی کہ رسول اللہ ﷺ کا کون سا تیل لگانے کا معمول تھا، البتہ زیتون کا تیل لگانے کی ترغیب روایات میں موجود ہے۔ چنانچہ حضرت عمر بن خطاب رضی الله عنہ فرماتے ہیں کہ رسول اللہ صلی اللہ علیہ وسلم نے فرمایا: ”زیتون کا تیل کھاؤ اور اسے لگاؤ، اس لیے کہ وہ مبارک درخت ہے" (سنن الترمذی، روایت نمبر:1851)
اس لیے کسی بھی فائدہ مند تیل (جو بالوں کو صاف ستھرا رکھنے میں معاون ہو) کو استعمال کرنے سے سنت پر عمل کرنے کا ثواب حاصل ہوجائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الشمائل المحمدية للترمذي: (رقم الحدیث: 32، ط: إحياء التراث)
حدثنا يوسف بن عيسى حدثنا وكيع حدثنا الربيع بن صبيح عن يزيد بن أبان هو الرقا شي عن أنس بن مالك قال: كان رسول الله صلى الله عليه وسلم يكثر دهن رأسه، وتسريح لحيته، ويكثر القناع، حتى كأنّ ثوبه ثوب زيّات.
سنن الترمذی: كتاب الأطعمة عن رسول الله صلى الله عليه وسلم، باب ما جاء في أكل الزيت، رقم الحدیث: 1851، ط: دار الغرب الاسلامی)
عن عمر بن الخطاب، قال: قال رسول الله صلى الله عليه وسلم: " كلوا الزيت وادهنوا به فإنه من شجرة مباركة "،
واللہ تعالٰی اعلم بالصواب
دارالافتاء الاخلاص،کراچی