سوال: انتقال ہونے کے بعد چالیس دن تک قبر پر کون سی سورت پڑھی جاتی ہے؟ اور دفنانے کے بعد اونٹ کے ذبح ہونے کے وقت تک کون سی سورت پڑھی جاتی ہے؟

جواب: 1) میت کے ایصال ثواب کے لئے کسی بھی وقت قرآن مجید پڑھنا جائز ہے، اسی طرح قبر پر جاکر کسی بھی وقت ایصال ثواب کے لئے تلاوت کرنا بھی جائز ہے، البتہ چالیس دنوں تک قبر پر جاکر کسی مخصوص سورت کا پڑھنا احادیث مبارکہ سے ثابت نہیں ہے۔
2) تدفین کے بعد قبر کے سرہانے سورۃ البقرۃ کا اول (الم سے المفلحون تک) اور قبر کے پاوں کی طرف سورۃ البقرۃ کا اٰخر ( آمن الرسول سے سورت ختم ہونے تک) پڑھنا مستحب ہے۔ اسی طرح احادیث سے تدفین کے بعد قبر پر کچھ دیر ٹہرنا اور میت کی مغفرت اور ثابت قدمی کے لیے دعا کرنا بھی ثابت ہے۔
(نوٹ: حدیث نبوی میں تدفین کے بعد "کچھ دیر ٹہرنے" کے الفاظ آئے ہیں، جس کی تشریح حضرت عمرو بن العاص رضی اللّٰه عنہ نے "اونٹ ذبح کرکے اس کے گوشت کی تقسیم جتنے وقت" سے کی ہے، ان الفاظ کا یہ مطلب نہیں ہے کہ اونٹ ذبح کیا جائے اور اس کا گوشت تقسیم کیا جائے، بلکہ صرف وقت کی مقدار کا اندازہ بتانا مقصود ہے اور عرب کے لوگ یہ کام بڑی پھرتی سے کم وقت میں مکمل کر لیتے تھے، مزید تفصیل کے لیے فتویٰ نمبر: 5509 دیکھیے)