سوال: مفتی صاحب! میرے شوہر کا 48 سال کی عمر میں انتقال ہوئے ایک ماہ ہو گیا ہے، مجھے صبر نہیں آ رہا ہے، دن بہ دن جینا مشکل ہوتا جا رہا ہے، کیا کروں؟ رہنمائی فرمائیں۔ میرے مرحوم شوہر نے اپنی آواز میں تلاوت قرآن کی ریکارڈنگ موبائل میں کی تھی، کیا وہ میں سن سکتی ہوں؟ کیا اس کا ثواب میرے شوہر کو پہنچے گا؟

جواب: دنیا میں ہر مخلوق ایک مخصوص وقت کے لیے آتی ہے اور جب اس کا مخصوص وقت ختم ہو جاتا ہے تو وہ اس دنیا سے چلی جاتی ہے۔ ہم سب کے سردار، آقا اور مولا جناب نبی کریم حضرت محمد مصطفی صلی اللہ علیہ وسلم کے اس دنیا سے رپردہ پرنے پر جب صحابہؓ غم سے نڈھال تھے تو ایسے وقت میں حضرت ابوبکر ؓنے اللہ تعالیٰ کی حمد وثنا کی، پھر فرمایا: "توجہ سے سنو"! جو شخص حضرت محمد ﷺ کی عبادت کرتا تھا اسے معلوم ہونا چاہیے کہ حضرت محمد ﷺ کی وفات ہوچکی ہے اور جو شخص اللہ تعالیٰ کی عبادت کرتا تھا تو بے شک اللہ تعالیٰ زندہ ہے اور اس پر کبھی موت نہیں آئے گی، پھر آپ نے یہ آیت پڑھی: ’’(اے پیغمبر) بے شک موت تمہیں بھی آنی ہے اور موت ان کو بھی آنی ہے" نیز یہ آیت بھی تلاوت فرمائی: ’’حضرت محمد ﷺ صرف رسول ہیں۔ آپ سے پہلے بہت سے رسول گزر چکے ہیں۔۔۔ الخ (صحیح البخاری، حدیث نمبر:3668)
جس سے معلوم ہوا کہ دنیا میں کسی بھی مخلوق کو بقا نہیں ہے، ہمیشہ رہنے والی ذات صرف اللہ رب العزت کی ہے، اور ہم سب اللہ کے ہیں اور ہم سب کو اللہ کی طرف لوٹ کر جانا ہے۔
یقیناً زندگی میں کچھ رشتے ہماری ذات کا حصہ بن جاتے ہیں، جیسے: والدین، بہن بھائی، شریک حیات، اولاد یا کوئی قریبی دوست وغیرہ، اور جب موت کا اٹل فیصلہ ان ہستیوں کو ہم سے جدا کرتا ہے تو دل کو شدید صدمہ اور گہرا غم ہوتا ہے، ایسے وقت میں اپنے عزیز کی جدائی کے غم و صدمہ کے باوجود ایک مومن بندہ کو اللہ اور رسول اللہ ﷺ کی تعلیمات کا پاس و لحاظ رکھنا اور صبر کا دامن تھامے رکھنا نہایت ضروری ہے، چنانچہ روایت میں ہے کہ نبی اکرم صلی اللہ علیہ وسلم ایک ایسی عورت کے پاس سے گزرے جو اپنے بچے کی موت کے غم میں رو رہی تھی، آپ صلی اللہ علیہ وسلم نے اس سے فرمایا: ”اللہ سے ڈرو اور صبر کرو “، اس عورت نے کہا: آپ کو میری مصیبت کا کیا پتا ؟ تو اس سے کہا گیا: یہ نبی اکرم صلی اللہ علیہ وسلم ہیں (جب اس کو اس بات کی خبر ہوئی) تو وہ آپ صلی اللہ علیہ وسلم کے پاس آئی، آپ کے دروازے پہ اسے کوئی دربان نہیں ملا، اس نے آپ صلی اللہ علیہ وسلم سے کہا: اللہ کے رسول! میں نے آپ کو پہچانا نہ تھا، آپ صلی اللہ علیہ وسلم نے فرمایا: ”صبر وہی ہے جو پہلے صدمہ کے وقت ہو“ یا فرمایا: ”صبر وہی ہے جو صدمہ کے شروع میں ہو“۔ (ابو داؤد، حدیث نمبر:3124)
صبر کرنے والے کے لیے بے شمار انعامات، مغفرت اور جنت کی خوشخبری سنائی گئی ہے۔
قرآن شریف کی آیات کا ترجمہ ہے: "اور دیکھو ہم تمہیں آزمائیں گے ضرور، (کبھی) خوف سے اور (کبھی) بھوک سے (کبھی) مال و جان اور پھلوں میں کمی کر کے اور جو لوگ (ایسے حالات میں) صبر سے کام لیں ان کو خوشخبری سنا دو ۔
یہ وہ لوگ ہیں کہ جب ان کو کوئی مصیبت پہنچتی ہے تو یہ کہتے ہیں کہ “ہم سب اللہ ہی کے ہیں اور ہم کو اللہ ہی کی طرف لوٹ کر جانا ہے۔ یہ وہ لوگ ہیں جن پر ان کے پروردگار کی طرف سے خصوصی عنایتیں ہیں، اور رحمت ہے اور یہی لوگ ہیں جو ہدایت پر ہیں۔" (سورہ بقرہ، آیت نمبر:155، 156، 157)
حدیث شریف میں آتا ہے کہ رسول اللہ صلی اللہ علیہ وسلم نے فرمایا ”اللہ تعالیٰ فرماتا ہے کہ میرے اس مومن بندے کا جس کی، میں کوئی عزیز چیز دنیا سے اٹھا لوں اور وہ اس پر ثواب کی نیت سے صبر کر لے تو اس کا بدلہ میرے یہاں جنت کے سوا اور کچھ نہیں۔“ (صحیح البخاری، حدیث نمبر:6424)
لہذا آپ اس صدمہ پر صبر کر کے ان اجر، انعامات اور جنت کی خوشخبری کے پروانے حاصل کرنے کی کوشش کریں، اس کے ساتھ ساتھ إِنَّا لِلَّهِ وَإِنَّا إِلَيْهِ رَاجِعُونَ، اللَّهُمَّ أَجِرْنِي فِي مُصِيبَتِي، وَأَخْلِفْ لِي خَيْرًا مِنْهَا (ترجمہ: بے شک ہم اللہ ہی کے لیے ہیں اور ہم اللہ ہی کی طرف لوٹنے والے ہیں، اے اللہ! میری مصیبت میں مجھے اجردے اور اس کے عوض مجھے اس کا اچھابدلہ عنایت فرما) کثرت سے پڑھنے کا اہتمام فرمائیں، ان شاء اللہ! امید ہے کہ اللہ پاک آپ کو صبر کے ساتھ ساتھ بہتر بدل بھی عطا فرمائیں گے۔ نیز آپ اپنے شوہر کی قرآن کریم کی ریکارڈنگ سن سکتی ہیں اور اللہ کی ذات سے امید ہے کہ آپ کے شوہر کو اس کا ثواب پہنچے گا۔