سوال: ایک شخص کا انتقال ہوا، اس نے اپنی حیات میں کچھ رقم شرکت کے کاروبار میں لگائی تھی۔ اس کی وصیت تھی کہ اگر اس کی وفات پہلے ہوگئی تو اس کا نفع اس کی بیوی کو ملتا رہے گا اور جب بیوی کا بھی انتقال ہوجائے تو اصل رقم کسی مسجد یا مدرسہ کو دے دی جائے۔ اب اس شخص اور اس کی بیوی دونوں کا انتقال ہوگیا ہے۔ اب اس وصیت کا شرعا کیا حکم ہے اور اس کو کیسے پورا کیا جائے گا؟

جواب: واضح رہے کہ وارث کے حق میں وصیت شرعاً باطل ہے ہاں! اگر کسی شخص نے اپنے کسی وارث کے لیے وصیت کی ہو تو وارث کے حق میں کی جانے والی وصیت دیگر ورثاء کی اجازت پر موقوف ہوگی، اگر دیگر تمام ورثاء بالغ ہوں اور انہوں نے اس وصیت کو پورا کرنے کی اجازت دے دی ہو تو اسے نافذ کیا جائے گا، اور جس کے لیے وصیت کی گئی ہے، اسے اس وصیت کے مطابق بھی حصہ دیا جائے گا اور اس کا شرعی حصہ بھی اسے ملے گا، لیکن اگر بعض ورثاء بالغ ہوں اور بعض نابالغ، اور بالغ ورثاء وصیت کے پورا کرنے کی اجازت دے دیں تو ان کے حصے کے بقدر وصیت پوری کی جائے گی اور نابالغ ورثاء کو ان کا حصہ پورا دیا جائے گا، اگر نابالغ ورثاء اجازت دے دیں تب بھی نابالغ کی اجازت کا اعتبار نہیں ہو گا، اور اگر ورثاء راضی نہ ہوں تو اس صورت میں اس وارث کو صرف اس کا متعین شرعی حصہ ملے گا اور یہ وصیت باطل ہوگی اور اس وصیت پر عمل نہیں کیا جائے گا، لہذا اس تفصیل سے معلوم ہوا کہ شوہر کا اپنی بیوی کے لیے مرنے کے بعد کاروبارکے نفع کی وصیت کرنا درست نہیں ہے۔