سوال: ایک مرحومہ خاتون کی ملکیت میں چالیس لاکھ روپے ہیں، اس کی اولاد نہیں ہہے، صرف ایک منہ بولی بیٹی ہے اور اس خاتون کے دو بھائی حیات ہیں، شوہر کا اس سے پہلے انتقال ہوچکا ہے، میاں بیوی نے اپنی ملکیت منہ بولی بیٹی کے لیے وصیت کی ہے، اب منہ بولی بیٹی اور مرحومہ کے دو بھائیوں کو کتنا حصہ ملے گا؟

جواب: واضح رہے کہ لے پالک ببٹی حقیقی بیٹی کے حکم میں نہیں ہوتی ہے، لہذا جس شخص نے اس کو گود لیا ہے، اس کے ترکہ میں اس لے پالک کا کوئی حق و حصہ متعین نہیں ہے، ہاں ! البتہ پالنے والا اپنی زندگی میں بطورِ ھدیہ اسے کوئی چیز دے کر اسے مالک بنا سکتا ہے اور اسی طرح اس کے حق میں ایک تہائی ترکہ تک کی وصیت بھی کر سکتا ہے۔
لہذا پوچھی گئی صورت میں مرحومہ کی تجہیز و تکفین کے جائز اور متوسط اخراجات، قرض کی ادائیگی کے بعد مرحومہ کی کل جائیداد منقولہ اور غیر منقولہ میں سے ایک تہائی (1/3) تک لے پالک بیٹی کے حق میں وصیت نافذ کی جائے گی، اس کے بعد مرحومہ کی بقیہ جائیداد دونوں بھائیوں میں آدھی آدھی تقسیم ہوگی۔