سوال: میری ایک ویب سائٹ ہے اس میں میں نے مختلف پروڈکٹس لگائی ہوئی ہیں جو کہ میرے پاس نہیں ہیں۔ مجھے جب آرڈر ملتا ہے، میں آگے کسی کمپنی کو آرڈر دے کر بنوالیتا ہوں اور پھر اسی کمپنی کے ذریعے وہ پراڈکٹ کسٹمر کو بھجوا دیتا ہوں، وہ پراڈکٹ میرے قبضے میں نہیں آتی بلکہ ڈائرکٹ کسٹمر کو پہنچ جاتی ہے اور وہ پراڈکٹ بالکل اس تفصیل کے مطابق ہوتی ہے جو مجھے کسٹمر نے بھیجی ہوتی ہے، ساتھ ہی اگر پراڈکٹ میں کوئی مسئلہ ہو تو رقم واپس ہوجاتی ہے اور اس کا نقصان مجھے ہوتا ہے، یعنی اس چیز کی مکمل ذمہ داری مجھ پر ہوتی ہے تو کیا یہ طریقہ جائز ہے؟

جواب: واضح رہے کہ جو چیز ملکیت اور قبضہ (Possession) میں نہ ہو٬ اسے آگے فروخت کرنا شرعا درست نہیں ہے٬ البتہ اس مرحلہ پر خرید و فروخت کا وعدہ کیا جاسکتا ہے کہ میں آپ کو فلاں چیز فروخت کروں گا۔
مذکورہ صورت میں چونکہ بیچی جانے والی چیز (Product) فروخت کرنے والی کی ملکیت میں نہیں ہوتی٬ بلکہ آرڈر ملنے کے بعد فروخت کرنے والا اسے خرید کر آگے بھیجتا ہے٬ اس لیے آرڈر لینے کے مرحلہ میں حتمی خرید و فروخت کا معاملہ کرنا جائز نہیں ہے٬ لہذا یہ وعدہ کے درجے میں ہو کہ فلاں تاریخ تک آپ کو فلاں چیز فروخت کروں گا٬ پھر جب وہ چیز خرید کر کسٹمر کو روانہ کریں گے اور کسٹمر وصول کرلے تو اس وقت عملی طور پر (تعاطی کے ذریعے) معاملہ مکمل سمجھا جائے گا۔
اس کی دوسری جائز صورت یہ ہو سکتی ہے کہ آپ متعلقہ کمپنی کے ساتھ وکالت (Agency) کا معاہدہ کرلیں کہ میں آپ کا مال بکوا دوں گا٬ اور اس کے عوض طے شدہ منافع لوں گا، ایسی صورت میں مال کی ملکیت اور راستے کے خطرات کی ذمہ داری آپ پر نہیں ہوگی٬ لہذا گاہک کے انکار کرنے یا راستے میں مال خراب ہونے کی صورت میں کمیشن ایجنٹ ذمہ دار نہیں ہوگا۔