سوال: کیا کسی دوسرے شخص کی طرف سے استخارہ کیا جاسکتا ہے؟ اور اگر کیا جاسکتا ہے تو استخارہ کی دعا کے الفاظ میں کیا تبدیلی کرنی پڑے گی؟

جواب: 1) واضح رہے کہ اصل سنت یہی ہے کہ آدمی خود اپنی حاجت کے لیے استخارہ خود کرے، جیسا کہ حدیث شریف سے معلوم ہوتا ہے:حضرت جابر رضی اللہ عنہ فرماتے ہیں کہ جناب رسول اللہ ﷺ قرآن کریم کی سورت کی طرح ہمیں تمام معاملات میں استخارہ کی تعلیم دیتے تھے۔ (بخاری، حدیث نمبر:6382)
اس حدیث سے معلوم ہوا کہ آدمی خود اپنے لیے استخارہ کرے، لیکن اگر کوئی شخص اپنے لیے کسی اور سے استخارہ کروائے تو اسے ناجائز نہیں کہا جاسکتا، کیونکہ استخارہ کا معنی ہے"طلبِ خیر" اور طلبِ خیر دوسرے کے لیے بھی کی جا سکتی ہے، البتہ کسی دوسرے کے لیے استخارہ کرنا سنت طریقہ نہیں ہے، اور اس کام کے لیے باقاعدہ دوسروں کو دعوت دینا، استخارہ سینٹر قائم کرنا، اس کے بدلے پیسے لینا یا اسے کاروبار کا ذریعہ بنالینا جائز نہیں ہے۔
2) اگر کسی دوسرے کے لیے استخارہ کرے تو ’’ أستخيرك ‘‘ اور ’’ أستقدرك ‘‘ کے الفاظ کے بعد’’ لفلان‘‘ اور ’’أن هذا الأمر خير لي ‘‘ میں ’’لي‘‘ كی جگہ ’’له‘‘ پڑھا جائے۔