سوال:
حضرت! حدیث شریف کا مفہوم ہے کہ ”جو شخص دن کے آغاز میں چار رکعت نماز پڑھے، وہ عاجز نہیں ہوگا“ تو کیا اس سے مراد فجر کی چار رکعت (یعنی 2 سنت + 2 فرض) ہیں یا اشراق کی چار رکعت مراد ہیں؟
اور اسی طرح سورہ یٰس کے بارے میں آتا ہے کہ ”جو شخص دن کے آغاز میں سورۃ یٰسین پڑھ لے، اس کے تمام کام بن جاتے ہیں“ تو اس سے مراد وقتِ صبح صادق ہے یا طلوعِ آفتاب کا وقت مراد ہے؟ رہنمائی فرمائیں۔ جزاکم اللہ خیرا و احسن الجزا
جواب: سوال میں ذکر کردہ حدیث میں چاشت کی چار رکعتوں کا ذکر ہے، چنانچہ امام ابو داؤد اور امام ترمذی رحمہما اللہ اور دیگر محدّثین کرام نے اس روایت کو اپنی حدیث کی کتابوں میں چاشت کی نماز کے عنوان کے تحت ذکر کیا ہے۔ چاشت کی نماز کا بہتر وقت رُبع النہار یعنی سورج طلوع ہونے کے بعد سے لے کر سورج غروب ہونے تک کے دورانیے کا ابتدائی چوتھائی حصہ گزرنے پر ہے اور چاشت کی نماز کم از کم دو رکعت اور زیادہ سے زیادہ بارہ رکعتیں ہیں، البتہ حدیث میں ذکر کردہ فضیلت کے حصول کے لیے کم از کم چاشت کی چار رکعت نماز پڑھی جائے گی۔
نیز حدیث مبارکہ کے مطابق سورہ یٰس صدر النہار یعنی دن کے ابتدائی حصّے (صبح صادق یا سورج طلوع ہونے کے بعد) میں پڑھنی چاہیے۔
۔۔۔۔۔۔۔۔۔۔۔۔۔۔۔۔۔۔۔۔۔
دلائل:
سنن الترمذی: (باب ما جاء فی صلاۃ الضحی، رقم الحدیث: 475، ط: دار الغرب الاسلامی )
عن أبي الدرداء وأبي ذر، عن رسول الله صلى الله عليه وسلم عن الله تبارك وتعالى أنه قال: «ابن آدم، اركع لي أربع ركعات من أول النهار أكفك آخره» هذا حديث حسن غريب.
سنن ابي داؤد: (باب فی صلاۃ الضحی، رقم الحدیث: 1289، ط: دار الرسالة العالمية)
عن نعيم بن همار، قال: سمعت رسول الله - صلى الله عليه وسلم - يقول: "يقول الله عز وجل: يا ابن آدم لا تعجزني من أربع ركعات في أول نهارك أكفك آخره"
شرح سنن أبي داود لابن رسلان: (396/6، ط: دار الفلاح )
(وفي أول نهارك) قال المنذري: ... وحمل العلماء هذه الركعات على صلاة الضحى.
العرف الشذي: (444/1، ط: دار التراث العربي)
قوله: (أربع ركعات إلخ) المشهور أن هذه صلاة الضحى
مرقاة المفاتيح شرح مشكاة المصابيح: (1491/4، ط: : دار الفكر)
(قال: بلغني أن رسول الله - صلى الله عليه وسلم - قال: " من قرأ يس ") بالسكون وقيل بالفتح (في صدر النهار) ، أي أوله (قضيت حوائجه) ، أي دينية ودنيوية أو آخرة أو مطلقا وهو الأظهر (رواه الدارمي مرسلا) .
واللہ تعالٰی اعلم بالصواب
دارالافتاء الاخلاص، کراچی