سوال: عبداللہ اپنا فرض حج ادا کرچکا ہے، پھر ہر چار سال کے بعد دو عمرے بھی کرچکا ہے، اس کو کچھ لوگ کہتے ہیں کہ عمرہ کرنے کے بجائے یہ رقم کسی ضرورت مند کو دے دو، اتنے زیادہ لوگ ضرورت مند ہیں یا کسی ایسے شخص کو عمرہ پر بھیج دو جس نے عمرہ نہ کیا ہو تو کیا اس کا عمرہ کرنے کے بجائے کسی کی مالی مدد کرنا یا کسی دوسرے کو عمرہ پر بھیجنا زیادہ بہتر عمل ہوگا؟ نیز کیا عبداللہ کسی اور کو بھیجنے کے بجائے اپنے والد صاحب کو عمرہ کراسکتا ہے، انہوں نے اگرچہ اپنے پیسوں سے عمرہ کیا ہوا ہے؟ یا پھر کسی ایسے شخص کو بھیجا جائے جو اب تک حرم نہ جاسکا ہو؟

جواب: اگر کسی شخص کو استطاعت ہو تو اس کے لیے بار بار عمرہ کرنا افضل اور مستحب ہے۔ احادیث مبارکہ سے بکثرت نفلی عمرے کرنے کی ترغیب معلوم ہوتی ہے، چنانچہ حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ایک عمرہ کے بعد دوسرا عمرہ درمیان کے گناہوں کے لیے کفارہ ہے۔ (صحیح مسلم، حدیث نمبر: 1349) اور  حضرت عمر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے فرمایا: ”حج اور عمرہ کو یکے بعد دیگرے ادا کرو، اس لیے کہ انہیں باربار کرنا فقر اور گناہوں کو ایسے ہی دور کر دیتا ہے جیسے بھٹی لوہے کے میل کو دور کرتی ہے “۔(سنن ابن ماجہ، حدیث نمبر: 2887)
اسی طرح غرباء و مساکین پر خرچ کرنا بھی بہت بڑے اجر کا باعث ہے، البتہ نفلی عمرہ کرنے اور غرباء و مساکین پر خرچ کرنے میں کونسا عمل زیادہ افضل ہے؟ اس بارے میں راجح قول یہ ہے کہ جس عمل کی ضرورت و حاجت زیادہ ہو اس کا اجر و ثواب دوسرے عمل کے بنسبت زیادہ ہوگا، لہذا اسی اصول کے پیش نظر اگر جاننے والوں میں کوئی شخص بہت زیادہ مالی تنگی کا شکار ہو اور اس کی بنیادی ضروریات کسی طرح پوری نہ ہورہی ہوں تو عمرہ کرنے والے شخص کے لیے افضل یہ ہے کہ عمرہ کرنے کے بجائے وہ رقم اس ضرورت مند کو دے دے، خصوصاً جبکہ مجبور اور ضرورت مند شخص کوئی رشتہ دار، دین دار یا آل رسول صلی اللہ علیہ وسلم میں سے ہو، لیکن اگر ایسی کوئی صورت درپیش نہ ہو تو پھر نفلی عمرہ کرنا افضل ہوگا۔
نیز واضح رہے کہ کسی شخص کا اپنی جگہ اپنے والد کو عمرہ پر بھیجنا جائز ہے اور اس بارے میں دوسرے شخص کے مقابلے میں والد کا حق مقدم ہوگا۔