سوال: صلوۃ التسبیح، صلوۃ الحاجت اور صلوۃ شکر کی حدیث کی روشنی میں وضاحت کر دیں کہ کیا یہ نمازیں سنت سے ثابت ہیں؟

جواب: آپ نے سوال میں تین نمازوں کے ثبوت سے متعلق پوچھا ہے، جن کی تفصیل درج ذیل ہے:‏
‏1) صلاۃ التسبیح
‏ صلاۃ التسبیح حدیث کی مستند کتاب "سنن أبی داؤد" میں مذکور جلیل القدر صحابی حضرت عبداللہ ابن عباس ‏رضی اللہ عنہ کی حدیث سے ثابت ہے، حدیث مبارکہ کا ترجمہ ملاحظہ ہو:‏
‏"حضرت ابن عباس رضی اللہ عنہما سے روایت ہے کہ رسول کریم صلی اللہ علیہ وسلم نے ایک دن اپنے چچا ‏حضرت عباس رضی اللہ عنہ سے ارشاد فرمایا : "اے عباس! اے میرے پیارے چچا! کیا میں آپ کی خدمت میں ایک ‏گراں قدر عطیہ اور قیمتی تحفہ پیش نہ کروں؟ کیا میں آپ کو ایک انعام نہ دوں؟ کیا میں آپ کو ایسی دس عادتیں نہ ‏بتلاؤں، جنہیں اگر آپ کرلیں تو اللہ تعالی آپ کے اگلے پچھلے، چھوٹے بڑے، کھلے چھپے، سارے گناہ معاف ‏فرمادے، وہ عمل صلوة التسبیح ہے"۔
پھر آپ علیہ السلام نے انہیں صلوٰۃ التسبیح کا طریقہ بتلانے کے بعد آخر میں ارشاد فرمایا: ‏
‏"اگر آپ سے ہوسکے تو روزانہ یہ نماز پڑھ لیا کریں، اور اگر روزانہ نہ پڑھ سکیں تو ہر جمعہ کو پڑھ لیا کریں، ‏اور اگر آپ یہ بھی نہ کرسکیں تو ہر مہینے میں ایک مرتبہ پڑھ لیں، اور اگر یہ بھی نہ ہوسکے تو سال میں ایک دفعہ پڑھ ‏لیا کریں، اور اگر یہ بھی نہ ہوسکے تو (کم از کم ) زندگی میں ہی ایک دفعہ پڑھ لیں۔ (سنن ابو داؤد، حدیث نمبر:1297)
‏2) صلاۃ الحاجة
صلاة الحاجۃ حدیث کی مایہ ناز کتاب "سنن ترمذی" میں ‏مذکور ایک حدیث سے ثابت ہے، ذیل میں اس کا ترجمہ نقل کیا جاتا ہے:‏
‏"حضرت عبدالله بن ابی اوفیٰ رضی اللہ عنہ سے روایت ہے کہ جناب رسول کریم ﷺ نے فرمایا: "جسے ‏اللہ تعالیٰ سے کوئی ضرورت ہو یا بنی آدم میں سے کسی سے کوئی کام ہو تو (پہلے) وہ اچھی طرح وضو کرلے، پھر ‏دو رکعتیں ادا کرے، پھر اللہ تعالیٰ کی حمد وثنا بیان کرے اور (اس کے) نبی( ﷺ) پر درود (وسلام) بھیجے، پھر یہ ‏‏(دعا ) پڑھے:‏
‏" لَا إِلَهَ إِلَّا اللَّهُ الْحَلِيمُ الْكَرِيمُ، ‏‏‏‏‏‏سُبْحَانَ اللَّهِ رَبِّ الْعَرْشِ الْعَظِيمِ، ‏‏‏‏‏‏الْحَمْدُ لِلَّهِ رَبِّ ‏الْعَالَمِينَ، ‏‏‏‏‏‏أَسْأَلُكَ مُوجِبَاتِ رَحْمَتِكَ، ‏‏‏‏‏‏وَعَزَائِمَ مَغْفِرَتِكَ، ‏‏‏‏‏‏وَالْغَنِيمَةَ مِنْ كُلِّ بِرٍّ، ‏‏‏‏‏‏‏وَالسَّلَامَةَ مِنْ كُلِّ إِثْمٍ، ‏‏‏‏‏‏لَا تَدَعْ لِي ذَنْبًا إِلَّا غَفَرْتَهُ، ‏‏‏‏‏‏وَلَا هَمًّا إِلَّا فَرَّجْتَهُ، ‏‏‏‏‏‏وَلَا حَاجَةً ‏هِيَ لَكَ رِضًا إِلَّا قَضَيْتَهَا يَا أَرْحَمَ الرَّاحِمِينَ"‏‎.‎(سنن ترمذي، حديث نمبر: 479)
‏3) صلاۃ الشکر
‏"مسند البزّار" میں حضرت عبد الرحمٰن بن عوف رضی اللہ عنہ سے ایک حدیث منقول ہے، فرماتے ہیں ‏کہ
‏"جناب نبی کریم ﷺ ایک دن اپنے در ِدولت سے نکلے، تو میں آپ کے پیچھے ہولیا، چنانچہ آپ ‏ﷺ ایک باغ میں داخل ہوئے، (وہاں) نماز پڑھی اور طویل سجدہ کیا، تو میں (دل ہی دل میں) کہنے لگا کہ اللہ ‏تعالیٰ نے جناب رسول اللہ ﷺ کے روح کو قبض کرلیا، میں یہ کبھی نہ دیکھوں۔ چنانچہ میں غمزدہ ہوگیا اور رونے ‏لگا، (جب) آپ ﷺ نے (فارغ ہونے کے بعد) اپنا سر مبارک اٹھایا تو مجھے آواز دے کر فرمایا: "تمہیں کیا ‏ہوگیا؟ یا کس چیز نے تمہیں پریشان کیا؟ میں نے کہا یا رسول اللہ! آپ نے بہت لمبا سجدہ کیا تو میں (اپنے دل میں) ‏کہنے لگا کہ اللہ جلّ شانہٗ نے آپ کی روح قبض کرلی ہے، اللہ مجھے یہ کبھی نہ دکھائے، اس لئے میں پریشان ہوکر ‏رُو پڑا، آپ ﷺ نے فرمایا: میں نے یہ (طویل) سجدہ اپنے رب کا شکر ادا کرنے کے لیے کیا، کیونکہ اللہ نے مجھے ‏اپنی امت کے متعلق آزمایا اور پھر (عظیم انعام اور خوشی کی خبر دے کر) ارشاد فرمایا کہ: "ان (آپ کی امت) میں ‏سے جو آپ کے اوپر دس مرتبہ درود پڑھےگا، میں اس کے لئے دس نیکیاں لکھوں گا"۔ ‏(مسند بزار، حدیث نمبر: 1006)
اسی طرح فتح مکہ کے دن بھی آپ ﷺ نے اپنی خوشی اور نعمت کا اظہار کرنے کے لئے شکرانہ کے نوافل ‏پڑھے، جس سے کسی خوشی کے موقع پر شکرانہ کے نوافل پڑھنے کا ثبوت ملتا ہے۔
لہٰذا مذکورہ تینوں نفل نمازیں (صلاۃ التسبیح، صلاۃ الحاجت اور صلاۃ الشکر) سنت اور احادیث سے ثابت ہیں، ‏ان پر وقتاً فو قتاً عمل کرتے رہنا چاہیے، البتہ انہیں لازم اور ضروری نہیں سمجھنا چاہیے۔