سوال: میرے شوہر کے دوست بینک میں ملازمت کرتے ہیں، وہ ہمارے ساتھ قربانی میں شامل ہونا چاہتے ہیں تو ان کا ہمارے ساتھ قربانی میں شامل ہونا صحیح ہے یا نہیں؟

جواب: سودی بینک کی ملازمت میں تفصیل ہے:
1) پہلی قسم کی ملازمت جس کا تعلق براہ راست سودی معاملات سے ہو، جیسے منیجر اور کیشئیر وغیرہ کی ملازمت، ایسی ملازمت بالکل حرام اور ناجائز ہے٬ اور ایسی ملازمت سے حاصل ہونے والی آمدنی بھی حرام ہے، لہذا اگر وہ اسی حرام رقم سے کسی کے ساتھ قربانی میں شرکت کرے گا تو دیگر شرکاء کی قربانی بھی درست نہیں ہوگی، البتہ اگر وہ کسی سے حلال رقم قرض کے طور پر حاصل کرے اور اس سے قربانی کرے تو اس صورت میں قربانی درست ہو جائے گی۔
2) دوسری قسم سودی بینک کی وہ ملازمت ہے جس کا تعلق براہ راست سودی معاملات سے نہ ہو، نہ اس کا تعلق سود کے لکھنے سے ہو، نہ سود پر گواہ بننے سے، اور نہ سودی معاملات میں کسی قسم کی شرکت ہوتی ہو، جیسے چوکیدار کی ملازمت، ایسی ملازمت اور اس سے حاصل ہونے والی آمدنی کے متعلق علماء کرام کی آراء مختلف ہیں، بعض علماء کرام فقہی دلائل کی بنیاد پر اس قسم کے ملازم کی آمدنی کو حرام قرار نہیں دیتے ہیں، البتہ احتیاط اسی میں ہے کہ اس قسم کے ملازم کے ساتھ بھی قربانی میں شرکت نہ کی جائے۔