سوال: ۱) قربانی کی نیت سے لیا گیا جانور قربانی سے پہلے مر جائے یا کھو جائے یا بیماری کے باعث اس کو ذبح کر دیں تو اس بارے میں کیا حکم ہے؟
۲)اگر کوئی شخص اس نیت سے جانور خریدے کہ بعد میں اس میں حصے دار ملا لوں گا، لیکن قربانی کے ایام ختم ہونے تک اس کے حصے مکمل نہ ہوں تو کیا حکم ہوگا؟

جواب: 1)‏ اگر مالدار یعنی صاحبِ نصاب شخص نے قربانی کی نیت سے جانور خریدلیا اور وہ قربانی سے پہلے مرگیا یا ‏گم ہوگیا یا بیماری کی وجہ سے قربانی کے ایام سے پہلے ذبح کرلیا گیا تو اس پر دوسرے جانور کی قربانی ‏واجب ہوگی، لیکن اگر غریب (غیر صاحبِ نصاب شخص) نے قربانی کی نیت سے جانور خریدلیا تو اس ‏پر دوسرے جانور کی قربانی واجب نہیں ہے۔
‏2)‏ اس شخص کو پہلے شرکاء کی تعیین کرکے جانور خریدنا چاہیے تھا، البتہ اب جبکہ جانور خریدلیا ہے تو اگر ‏وہ چاہے تو اپنی طرف سے (اسی طرح سرکار دو عالم صلی اللہ علیہ وسلم یا اپنے والدین یا کسی اور کی طرف سے نفلی حصوں کی نیت کرکے) اس ‏جانور کی قربانی کرلے، لیکن اگر وہ اسے بیچ کر دوسرا جانور خریدنا چاہے، تو ایسی صورت میں اس ‏کے لئے ضروری ہے کہ اس جانور میں اس نے اپنے لئے جو حصہ رکھا ہو (خواہ ایک حصہ ہو یاایک سے ‏زائدجتنے بھی حصے ہوں)‏‎‏ دوسرے جانور کی قیمت اس حصے کے برابر ہو یا اس سے زائد ہو، اگر ‏دوسرے جانور کی قیمت اس سے کم ہو تو زائد قیمت صدقہ کرنا ہوگا۔