سوال: میری عمر 24 سال ہے، میرے گھر والوں نے میری منگنی کی بات میری ایک رشتہ دار لڑکی جو مجھے پسند ہے، اس سے طے کی، جب ان کی عورتیں ہمارے گھر رشتہ کرنے آئیں تو مجھے میری والدہ نے کہا کہ تم ان کے ہاتھ چھوم لو، ان میں میری ساس بھی تھی، میں نے ان کا ایک ہاتھ چوما۔
میں جب کسی عورت کو دیکھتا ہوں تو مجھے خواہش ہونے لگتی ہے، اس دوران میں نے اپنی ساس کا چہرہ یا چھاتی نہیں دیکھی ہے، نہ ہی ان سے زنا کرنے کا خیال دل میں آیا ہے، لیکن مجھے اس وقت وسوسہ آیا کہ ہاتھ چھومنے کے بہانے عورتوں کو چھولوں۔ مجھے یقین ہے کہ اس دوران مجھے خواہش ہوئی ہوگی اور میں نے اپنی شرمگاہ میں سختی بھی محسوس کی ہوگی۔ ابھی پندرہ دن پہلے میں نے حرمت مصاہرت کا مسئلہ پڑھا جس کی وجہ سے میں بہت پریشان ہوں۔ میں نے والدین کو بھی اس بارے میں بتادیا ہے، وہ بھی رو رہے ہیں اور بدنامی کی وجہ سے بہت پریشان ہیں، اس شادی کے توڑنے سے ہمارے رشتہ داروں کو بھی بہت تکلیف ہوگی، آپ میری شرعی رہنمائی فرمائیں کہ آیا اس لڑکی سے میرا نکاح جائز ہے؟

جواب: واضح رہے کہ حرمت مصاہرت کے ثبوت کے لیے شہوت کے ساتھ چھونا شرط ہے اور شہوت کے ساتھ چھونے کا مطلب یہ کہ مرد کے آلہ تناسل میں جسمانی طور پر انتشار پیدا ہوجائے یا اگر پہلے سے انتشار کی حالت میں ہو تو چھونے کے وقت اس میں مزید اضافہ ہو جائے۔
سوال میں پوچھی گئی صورت میں اگر آپ کو یقین ہے کہ ساس کے ہاتھ کا بوسہ لیتے وقت آپ کو شہوت ہوئی تھی اور آلہ تناسل منتشر ہوا تھا یا اگر پہلے سے منتشر تھا تو اس میں مزید اضافہ ہوا تھا تو اس صورت میں حرمت مصاہرت ثابت ہوجائے گی، اور آپ کے لیے اپنی منگیتر سے نکاح کرنا جائز نہیں ہوگا، لیکن اگر آپ کو اپنی ساس کے ہاتھ کا بوسہ لیتے وقت شہوت کا محض شک ہو یا شہوت بوسہ لینے کے بعد پیدا ہونے کا یقین ہو تو اس صورت میں حرمت مصاہرت ثابت نہیں ہوگی، اور آپ کے لیے اپنی منگیتر سے نکاح کرنا جائز ہوگا۔
نوٹ: منگیتر کی والدہ نکاح سے پہلے شرعا نامحرم ہے، لہذا اس سے ہاتھ ملانا یا اس کے ہاتھ کو بوسہ دینا ناجائز اور حرام ہے، جس سے اجتناب ضروری ہے۔