سوال: آج کل ہمارے شہر رحیم یار خان میں پکی اینٹ کے بھٹہ والے لوگوں سے اگست کے مہینے میں پیسے لیتے ہیں اور چار ماہ بعد ان کو طے شدہ شرائط و قیمت کے مطابق اینٹ دیتے ہیں، لوگ اس لئے پیشگی پیسے دیتے ہیں کہ اس میں فی ہزار اینٹ میں دو سے تین ہزار کا فائدہ ہوتا ہے بعض لوگ تو اینٹ وصول کرتے ہیں اور اگے فروخت کر دیتے ہیں اور بعض لوگ اس وقت کی قیمت پر بھٹہ والوں کو ہی فروخت کردیتے ہیں۔ کیا یہ درست ہے؟

جواب: پوچھی گئی صورت میں اگر اینٹوں کی طے شدہ ساری قیمت شروع میں پیشگی ادا کردی جائے، اور طے شدہ مدت کے بعد مطلوبہ معیار و مقدار کے مطابق اینٹیں گاہک کو دیدی جائیں، تو یہ صورت فقہی لحاظ سے "استصناع" (آرڈر پر کوئی چیز تیار کروانا) کہلاتی ہے، جوکہ جائز ہے، بشرطیکہ اس کے ناجائز ہونے کی کوئی اور وجہ نہ پائی جائے۔
واضح رہے کہ مذکورہ صورت میں اینٹیں خریدنے کے بعد اسی بھٹہ والوں کو وہ اینٹیں زیادہ قیمت پر فروخت کرنا سود حاصل کرنے کا ایک حیلہ اور ذریعہ بن سکتا ہے، اس لئے ایسا کرنا "سد ذریعہ" کے طور پر ممنوع ہوگا، لہذا اس سے اجتناب لازم ہے، البتہ اگر اسی بھٹہ والوں کو دوبارہ اینٹیں فروخت کرنا پہلے سے طے شد نہ ہو، بلکہ اتفاقی طور پر اس کی صورت پیش آجائے، یا مارکیٹ میں اینٹوں کی قیمت بڑھ جانے کی وجہ سے بھٹہ والوں کو زیادہ قیمت پر وہ اینٹیں دوبارہ فروخت کردی جائیں تو اس کی گنجائش معلوم ہوتی ہے۔