سوال: چالیس سال کی عمر پر پہنچنے پر کوئی خاص دعا اور اس کا ادب ہو تو بتادیں۔ جزاک اللہ

جواب: جب چالیس کى عمر ہو جائے تو انسان کو یہ دعاء پڑھنى چاہیے: "رَبِّ ‌أَوْزِعْنِي ‌أَنْ ‌أَشْكُرَ ‌نِعْمَتَكَ ‌الَّتِي أَنْعَمْتَ عَلَيَّ وَعَلى والِدَيَّ وَأَنْ أَعْمَلَ صالِحاً تَرْضاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ"
یہ دعا قرآن کریم میں سورہ أحقاف کى آیت نمبر 15 میں مذکور ہے، اس آیت کا ترجمہ اور تفسیر درج ذیل ہے:
ترجمہ:
"یا رب! مجھے توفیق دیجیے کہ میں آپ کی اس نعمت کا شکر ادا کروں جو آپ نے مجھے اور میرے ماں باپ کو عطا فرمائی اور ایسے نیک عمل کروں جن سے آپ راضی ہوجائیں، اور میرے لیے میری اولاد کو بھی صلاحیت دے دیجیے، میں آپ کے حضور توبہ کرتا ہوں اور میں فرمانبرداروں میں شامل ہوں"۔ (سورۃ الأحقاف: آیت نمبر: 15)
تفسیر:
اس آیت کى تفسیر میں حضرت مفتى محمد شفیع عثمانی صاحب نور اللہ مرقدہ نے اپنی تفسیر "معارف القرآن" جلد 7 ص 807 میں تحریر فرمایا ہے:
"قرآن نے اس جگہ "حتى إذا بلغ أشدہ سے لے کر من المسلمین" تک سب صیغے ماضی کے استعمال فرمائے ہیں جس سے ظاہر یہ ہے کہ یہ بیان کسی خاص واقعہ اور خاص شخص کا ہے، جو نزول آیت کے وقت ہو چکا ہے، اسی لیے تفسیر مظہری نے اسی کو اختیار کیا ہے کہ یہ سب حالات حضرت ابوبکر صدیق رضی اللہ عنہ کے ہیں، انہی کا بیان بالفاظ عام اس حکمت کے ساتھ سے کیا گیا ہے کہ دوسرے مسلمانوں کو بھی اس کی ترغیب ہو کہ وہ بھی ایسا ہی کیا کریں۔ ابن کثیرؒ نے چونکہ پہلی تفسیر کو اختیار کیا ہے کہ مراد عام انسان ہے تو جو الفاظ خصوصیت کے اس میں آئے ہیں جیسے: "حتى إذا بلغ أشدہ وبلغ أربعین سنة" وہ سب بطور تمثیل کے ہیں، جس میں یہ ہدایت دینا مقصود ہے کہ انسان جب 40 سال کی عمر کو پہنچے تو اس کو اپنی اصلاح اور اپنے اہل و عیال کی اصلاح اور آخرت کی فکر غالب ہو جانی چاہیے۔ واللہ سبحانہ وتعالى أعلم"۔
(معارف القرآن: جلد 7 ص 807، طبع: مکتبہ معارف القرآن)
ہمیشہ سے بزرگانِ دین نے اپنی دعاؤں میں اس دعا کو شامل فرمایا ہے، چنانچہ تفسیر رازى میں ہے کہ جب حضرت عمر بن عبد العزیزؒ کى عمر جب چالیس برس ہو گئى تو آپ یہ دعا مانگا کرتے تھے، لہذا یہ قرآنى دعا ہے، اس کا اہتمام کرنا چاہیے۔