سوال: مفتی صاحب! تدفین کے بعد مردے کو کلمہ کی تلقین کرنا کیسا ہے؟ کیا اس پر کوئی حدیث ہے؟

جواب: واضح رہے کہ میت کو دفن کرنے کے بعد تلقین کرنے سے متعلق جس روایت سے استدلال کیا جاتا ہے، وہ سند کے اعتبار سے کمزور ہے۔ جمہور ائمہ کرام اور فقہائے احناف کے نزدیک دفن کے بعد تلقین نہیں ہے اور اس دور میں اعتقادی خرابی کی وجہ سے اس سے اجتناب کرنا چاہیے، خاص کر جبکہ دفن کے بعد تلقین اب روافض کا شعار اور طریقہ بھی بن چکا ہے، اس لیے اس سے اجتناب کرنا ہی زیادہ بہتر ہے۔
ذیل میں میت کو دفن کرنے کے بعد تلقین کرنے سے متعلق جس روایت سے استدلال کیا جاتا ہے، اس روایت کا ترجمہ، تخریج، اسنادی حیثیت اور تلقین کے بار ے میں علمائے کرام کے اقوال ذکر کیے جاتے ہیں:
ترجمہ:
سعيد بن عبد الله الأودی کہتے ہیں کہ میں حضرت ابو امامہ رضی اللہ عنہ کی خدمت میں حاضر ہوا جبکہ وہ حالتِ نزع میں تھے، کہنے لگے: جب میں فوت ہوجاؤں تو میرے ساتھ اسی طرح کرنا جس طرح ہمیں رسول اللہ ﷺ نے حکم دیا ہے، آپ نے ہمیں حکم فرمایا تھا، جب تم میں سے کوئی فوت ہوجائے اور تم اس کی قبر پر مٹی برابر کرچکو تو تم میں سے ایک اس کی قبر کے سر کی جانب کھڑا ہو کر کہے، اے فلاں عورت کے بیٹے فلاں! جب وہ یہ کہے گا تو مردہ اٹھ کر بیٹھ جائے گا، پھر وہ کہے کہ اے فلاں عورت کے بیٹے فلاں! وہ کہے گا، اللہ تجھ پر رحم کرے، ہماری رہنمائی کر، لیکن تم یہ باتیں سمجھ نہیں سکتے، پھر کہے کہ تو اس بات کو یاد کر جس پر دنیا سے رخصت ہوا ہے، اس بات کی گواہی کہ اللہ کے سوا کوئی معبود نہیں اور محمد ﷺ اس کے بندے اور رسول ہیں، تو اللہ کے رب ہونے، محمد ﷺ کے نبی ہونے، اسلام کے دین ہونے اور قرآن کے امام ہونے پر راضی تھا، منکر اور نکیر میں سے ایک دوسرے کا ہاتھ پکڑ کر کہتا ہے، چلو، جس آدمی کو اس کی حجت تلقین کردی گئی ہے، اس کے پاس ہم نہیں بیٹھتے، چنانچہ دونوں کے سامنے اللہ تعالیٰ اس کا حامی بن جائے گا، ایک آدمی نے عرض کیا، اے اللہ کے رسول! اگر وہ (تلقین کرنے والا ) اس (مرنے والے) کی ماں کو نہ جانتا ہو تو( کیا کرے )؟ فرمایا: وہ اسے حوّاء کی طرف منسوب کرکے کہے، اے حواء کے فلاں بیٹے! (المعجم الکبیر للطبرانی، حدیث نمبر:7979)
تخریج الحدیث:
۱۔مذکورہ روایت کوامام طبرانی (م360ھ)نے ’’المعجم الکبیر‘‘(249/8،رقم الحديث"7979،ط:مكتبة ابن تيمية) (1367/3 ،رقم الحديث:1214،ط:دارالبشائرالإسلامية)میں ذکرکیا ہے۔
مذکورہ روایت کی اسنادی حیثیت:
علامہ ابن الصلاح (م643ھ)، امام نووی (م676ھ) اور علامہ عراقی (م806ھ)نے اس روایت کو’’ضعیف ‘‘قراردیا ہے۔
علامہ ابن قیم(م751ھ)فرماتےہیں:اس کا مرفوع ہونا صحیح نہیں ہے۔
علامہ ہیثمی(م807ھ)فرماتے ہیں: اس کی سند میں کئی راویوں کو میں نہیں جان پایا،یعنی وہ مجہول ہیں۔
علامہ ابن حجر عسقلانی(م852ھ)نے ’’نتائج الأفکار‘‘(428/4)میں اس روایت کے بارے میں فرمایا:اس روایت کو امام طبرانی نے دو طرق سے نقل کیا ہے۔۔۔اور حدیث کے دونوں طریق انتہائی ضعیف ہیں، لیکن علامہ ابن حجر عسقلانی نے خود ہی ’’تلخیص الحبیر‘‘(311/2)میں اس روایت کی سند کو درست قرار دیا اور اس روایت کے شواہد بھی ذکر کیے ہیں، اسی طرح علامہ ابن الملقن (م804ھ) بھی فرماتے ہیں کہ میں اس کی سند میں کوئی حرج کی بات نہیں جانتا۔
علامہ ابن القیم نے اگرچہ اس روایت پر ’’زادا لمعاد‘‘ (504/1) اور ’’تھذیب السنن‘‘(454/2) میں کلام کیا ہے اور کہا ہے کہ اس روایت کے ضعف پر اتفاق ہے اور اس جیسی روایت قابلِ حجت نہیں بن سکتی، لیکن انہوں نے ’’کتاب الروح‘‘(ص:32)میں ’’تلقین‘‘ پر کلام کرتے ہوئے فرمایا کہ’’زمانہ قدیم سے آج تک تلقینِ میت پر لوگوں کا عمل رہا ہے اور امام احمد سے پوچھا گیا تو انہوں نے لوگوں کے عمل کو دلیل بناتے ہوئے اس کو مستحسن قرار دیا اور اس بارے میں ایک ضعیف روایت بیان کی جاتی ہے۔ علامہ ابن قیم اس روایت کو نقل کرکے کہتے ہیں:’’یہ حدیث اگرچہ ثابت نہیں، لیکن اس پر تمام شہروں اور زمانوں میں بغیر کسی نکیر کے عمل ہوتا رہا ہے‘‘۔
علامہ عجلونی(م1162ھ)نے ’’کشف الخفاء‘‘(363/1)میں تفصیل سے کلام کرنےکے بعد آخر میں فرمایا: اس عمل پر دلیل طبرانی کی نقل کردہ روایت ہے جو اگرچہ ضعیف ہے، لیکن قابل اعتماد ہے اور محدثین کرام کا اتفاق ہے کہ فضائل اور ترغیب وترہیب سے متعلق روایات میں چشم پوشی کی جاتی ہے(قبول کی جاتی ہے)اور اہل ِشام کا اس وقت سے لے کر آج تک اس پر عمل ہے۔
علامہ صنعانی(م1182ھ)نے’’جمع الشتیت‘‘(ص:80)میں تلقین کے مسئلے کو نقل کرکے علامہ ابن القیم پر سخت نقد کیا ہے اور اپنی کتاب’’سبل السلام‘‘(502/1)لکھا ہے کہ محققین ائمہ کرام کے کلام کا خلاصہ یہ ہے کہ یہ حدیث ضعیف ہے اور اس پر عمل کرنا بدعت ہے، اس بدعت کو اختیار کرنے والوں کی کثرت دیکھ کر دھوکہ نہیں کھانا چاہیے۔
دفن کے بعد تلقین کا حکم:
علامہ ابن الصلاح، امام نووی، بعض شوافع کے نزدیک تلقین مستحب ہے۔
علامہ نووی فرماتے ہیں: تلقین شوافع کے ہاں مستحب ہے اور اس کے مستحب ہونے کی وضاحت ہمارے شوافع علمائے کرام میں سے قاضی حسین، متولی، شیخ نصر المقدسی، اورالرفاعی وغیرہ نے کی ہے اور ابن صلاح سے تلقین میت کے بارے میں پوچھا گیا تو فرمایا کہ ہم اسے پسند بھی کرتے ہیں اور اس پر عمل بھی کرتے ہیں اور اس سے متعلق ہم حدیث ابو امامہ بھی نقل کی ہے اگرچہ اس کی سند کمزور ہے، لیکن اس روایت کو شواہد اور اہلِ شام کے عمل کی وجہ سے تقویت ملتی ہے۔
ملا علی قاری (م1014ھ) لکھتے ہیں کہ حافظ ابن حجر کا کہنا ہے کہ اِس روایت میں میت کو دفن کر چکنے کے بعد تلقین کرنے کی طرف اشارہ کیا گیا ہے اور ہمارے مذہب کے مطابق یہ معتمد سنت ہے، بخلاف ان کہ جنہوں نے اس کو بدعت گمان کیا اور اس بارےمیں واضح حدیث بھی موجود ہے، جس پر فضائل کے باب میں بالاتفاق نہ صرف عمل کیا جا سکتا ہے بلکہ اس کے اتنے شواہد و توابع ہیں جو اسے درجہ حسن تک پہنچا دیتے ہیں۔
فقہائے احناف کے اقوال:
تنویر الابصار میں ہے کہ’’ دفن کرنے کے بعد تلقین نہیں کی جائے گی‘‘۔
علامہ عینی (م855ھ)فرماتے ہیں:ظاہر الروایہ کے مطابق احناف کے نزدیک تلقین نہیں کی جائے گی۔
مولانا ظفر احمد عثمانى(م1394ھ)تلقین سے متعلق تفصیلاً کلام کرنے کے بعد لکھتے ہیں:خلاصۂ کلام یہ ہے کہ بعد از دفن تلقین اگرچہ حدیث میں منقول ہونے کی وجہ سے مستحب ہے، لیکن چونکہ اب یہ روافض کا شعار بن چکا ہے اور اہل ِ سنت نے اس کو ترک کردیا ہے، لہذا اب تلقین نہیں کرنی چاہیے۔
خلاصہ ٔکلام:
میت دفن کرنے کے بعد تلقین کا ذکر اگرچہ بعض روایات میں ہے، لیکن وہ روایت ضعیف اورکمزور ہے، جیسا کہ تفصیل سے معلوم ہوا اور دفن کے بعد تلقین کے بارے میں چونکہ فقہائے کرام کا اختلاف ہے، بعض جواز اور بعض عدم جواز کے قائل ہیں، اس لیے اس دور میں اعتقادی خرابی کی وجہ سے احتراز اولیٰ و افضل ہے۔