سوال: بلوچستان میں اگلے اڑتالیس گھنٹوں کے دوران ماہرین نے زلزلہ کی پیشگوئی کی ہے، اس بارے میں اسلامی تعلیمات کیا ہیں؟ مسلمانوں کو ایسے موقع پر کیا کرنا چاہیے؟

جواب: زلزلہ اور دیگر آفات و بلیات کے موقعوں پر ایک مسلمان کو درجہ ذیل کاموں کا اہتمام کرنا چاہیے:
(1) ان مواقع میں سب سے ضروری اور اہم کام اپنے گناہوں سے توبہ واستغفار کرنا ہے، احادیث مبارکہ سے معلوم ہوتا ہے کہ گناہوں کی کثرت زلزلہ کا سبب ہوتا ہے، اور گناہوں سے توبہ کرنا اس سے ذریعہ نجات ہے۔
(2) کثرت سے صدقہ وخیرات کرنا چاہیے۔
(3) جو لوگ زلزلہ وغیرہ آفات کے زد میں آجائیں ان کی مدد کی جائے، یہ ایک مسلمان کا شرعی و اخلاقی فریضہ ہے۔
(4) مندرجہ ذیل دعاؤں کا اہتمام کرنا چاہیے:
" اللَّهُمَّ إِنِّي أَعُوذُ بِعَظَمَتِكَ أَنْ أُغْتَالَ مِنْ تَحْتِي
ترجمہ: اے اللہ! میں آپ کی عظمت کی پناہ مانگتا ہوں اس بات سے کہ میں نیچے سے ہلاک کیا جاؤں (یعنی زلزلہ سے)۔
(سنن النسائی، باب الاستعاذة، رقم الحديث: 5529)
اَللّٰهُمَّ إِنِّي أَعُوذُ بِكَ مِنَ الهَدْمِ، وَأَعُوذُ بِكَ مِنَ التَّرَدِّي، وَأَعُوذُ بِكَ مِنَ الْغَرَقِ، وَالْحَرَقِ، وَالْهَرَمِ، وَأَعُوذُ بِكَ أَنْ يَتَخَبَّطَنِي الشَّيْطَانُ عِنْدَ الْمَوْتِ، وَأَعُوذُ بِكَ أَنْ أَمُوتَ فِي سَبِيلِكَ مُدْبِرًا، وَأَعُوذُ بِكَ أَنْ أَمُوتَ لَدِيغًا.
ترجمہ: اے اللہ ! میں تیری پناہ مانگتا ہوں، دب کر مرنے سے، اور تیری پناہ مانگتا ہوں، گر کر مرنے سے، اور ڈوب کر مرنے سے، اور جل کر مرنے سے، اور بڑھاپے کی کمزوری سے، اور میں تیری پناہ مانگتا ہوں، اس بات سے کہ موت کے وقت مجھے شیطان اچک لے، اور اس بات سے تیری پناہ مانگتا ہوں کہ میں تیرے راستے میں پیٹھ پھیر کر مروں، اور اس بات سے میں تیری پناہ مانگتا ہوں کہ کسی موذی جانور کے ڈسنے سے مروں۔
(السنن لابي داؤد، بَابٌ فِي الِاسْتِعَاذَةِ، رقم الحدیث: 1552)