سوال: کسی بزرگ، ولی یا عالم دین کی قبر پر اس لیے جانا کہ وہاں جا کر دعا کرنے پر دعا قبول ہوتی ہے اور اپنے مقاصد میں کامیابی ملتی ہے، کیا ان کی قبروں پر دعا کی قبولیت کی امید لیکر جانا چاہیے یا نہیں؟ ایسا کرنا بدعت تو نہیں؟ جواب دے کر مشکور فرمائیں۔

جواب: واضح رہے کہ اولیاء اللہ کے مزارات پر جانا اور وہاں جا کر ان کی مغفرت، بلندی درجات کی دعا اور ایصال ثواب وغیرہ کرنا جائز ہے، نیز ان کے مزار کے پاس اللّٰہ تعالیٰ سے اپنی حاجات کے لیے دعا مانگنا اور دعا میں ان مرحوم بزرگ کا وسیلہ ذکر کرنا بھی جائز ہے، لیکن دعا کے قبول ہونے کے لیے یہ سب باتیں ضروری نہیں ہیں، نہ مزار پر جانا ضروری ہے، نہ ہی ان کے وسیلے سے دعا مانگنا ضروری ہے، البتہ چونکہ شرعاً ان سب باتوں کا ثبوت ہے، اس لیے ان پر عمل کرنے میں حرج نہیں ہے، بشرطیکہ اس میں غلو نہ کیا جائے، اس لیے اس سلسلے میں یہ عقیدہ رکھنا کہ دعا کی قبولیت مزار پر جا کر ہی ہو گی یا ان بزرگ کے وسیلے کے بغیر دعا قبول ہی نہیں ہوگی، تو ایسا طرز عمل غلو اور بدعت کے زمرے میں آئے گا۔