سوال: دو بھائی ایک ہی گھر میں مقیم ہیں۔ چند دن پہلے ایک بھائی نے اپنا سامان دوسرے بھائی کی غیر موجودگی میں دوسرے بھائی کے کمرے میں شفٹ کردیا اور اگلے دن خود بھی بیرون ملک چلا گیا۔ اس کے جانے کے بعد دوسرے بھائی کی بیوی نے اپنا سامان اپنے کمرے میں اور اس کا سامان اس کے کمرے میں پہلے جیسی ترتیب کے مطابق شفٹ کردیا۔
اس بات کو ہفتہ گزرنے کے بعد بیرون والے بھائی نے اپنی بہن کو کال کر کے کہا کہ "اگر میرا سامان اس کمرے سے باہر نکالا تو میری بیوی کو تین طلاق"، جبکہ سامان پہلے ہی باہر نکالا جا چکا تھا۔ اس کی یہ بات سن کر باقی گھر والوں نے سامان دوبارہ اسی کمرے میں رکھ دیا اور اس کو ویڈیو بنا کر بھیج دی کہ سامان وہیں ہے جہاں آپ رکھ کر گئے تھے۔
معلوم یہ کرنا ہے کہ کیا اس صورت میں کیا طلاق واقع ہوگئی یا نہیں؟

جواب: سوال میں پوچھی گئی صورت میں شوہر نے طلاق کو سامان کمرے سے باہر نکالنے کے ساتھ معلق کیا ہے، اس لیے مستقل میں جب بھی یہ سامان مذکورہ کمرے سے باہر نکالا جائے گا تو اس کی بیوی پر تین طلاقیں واقع ہوجائیں گی، البتہ تعلیق سے پہلے سامان کو کمرے سے باہر نکالنے کی وجہ سے بیوی پر طلاق واقع نہیں ہوئی ہے۔