سوال: میں اپنے دو سال کے بچے کو ذہانت کی غرض سے زعفران سے سورہ الم نشرح لکھ کر پلاتی ہوں، لیکن زعفران سے بہت مشکل سے لکھا جاتا ہے، کیا میں اسے پوئنٹر سے لکھ کر پلاسکتی ہوں، اس سے نقصان تو نہیں ہوگا؟
مزید میرا دو سال کا بچہ اس کے باپ یا دادا کے گھر میں داخل ہونے پر ڈر جاتا ہے، باہر جانے سے گھبراتا ہے، حالانکہ پہلے ایسے نہیں تھا، کوئی ایسی دعا بتادیں جس سے اس کا خوف ختم ہوجائے اور دل مضبوط ہوجائے اور اس کا ضدی پن ختم کرنے کے لیے بھی کوئی دعا بتادیں۔

جواب: واضح رہے کہ ذہانت یا حافظہ ‏بڑھانے کے لیے "سورہ الم نشرح"، "رب زدنی علما" یا "رب اشرح لی صدری" والی آیات یا کوئی اور وظیفہ خاص طور پر زعفران ہی سے لکھ کر پلانا ضروری نہیں ہے، بلکہ ان آیات کو خود پڑھنا یا پڑھ کر پانی وغیرہ پر دم کرکے ‏پینا اور پلانا بھی مفید ہے۔
گھبراہٹ، ڈر اور خوف کی وجہ نظر بد وغیرہ بھی ہوسکتی ہے، ایسی صورت میں آیت الکرسی کے ساتھ ‏معوّذتین (قل اعوذ برب الفلق اور قل اعوذ برب الناس) پابندی کے ساتھ پڑھ کر بچہ پر دم کرنا مفید ہے، نیز ‎حدیث سے درج ذيل دعا بچے پر پڑھ کر دم کرنا بھی ثابت ہے:‏" أُعِيذُ بِكَلِمَاتِ اللَّهِ التَّامَّةِ مِنْ كُلِّ شَيْطَانٍ وَهَامَّةٍ، وَمِنْ كُلِّ عَيْنٍ لَامَّة" ‏‏(ترمذی، حدیث نمبر:2060)‏
اس کے ساتھ ساتھ والدین کو اللہ تعالیٰ سے رجوع کرنا اور بچے کی کیفیت بدلنے کی دعا کرنے کا اہتمام بھی کرنا ‏چاہیے۔