سوال: مفتی صاحب! آج سے تقریباً پچیس تیس سال پہلے میرے بڑے بھائی نے اپنے پیسوں سے ایک تھیلیوں کا کاروبار شروع کیا تھا، کاروبار شروع کرنے کے تھوڑے عرصہ مجھے بھی اپنی دکان پر کام کے لیے بلالیا تھا، لیکن میری کوئی مزدوری طے نہیں ہوئی تھی، بس مجھے جتنی ضرورت ہوتی تھی، میں وہ لے لیتا تھا، میں نے اس کام کو چمکانے میں دن رات خوب محنت کی ہے، بھائی کو اس کا اعتراف بھی ہے، اس کام سے ہم نے کئی مال و جائیداد بنالی ہے، بھائی سے جب بھی کوئی پوچھتا تھا تو بھائی یہی کہتے تھے کہ یہ ہم دونوں بھائیوں کا آدھا آدھا ہے، یہانتکہ جب میرا رشتہ ہونے لگا تو میرے سسرال والوں کو بھی بھائی نے یہی کہا تھا کہ جو کچھ بھی ہے وہ ہم دونوں کا آدھا آدھا ہے، اس طرح ہم ہنسی خوشی رہ رہے تھے۔
اب حالات کی وجہ سے ہم علیحدہ ہونا چارہے ہیں تو بھائی اپنی بات سے مکر رہے ہیں اور مجھے آدھا دینے کے لیے تیار نہیں ہورہے ہیں، بلکہ کہہ رہے ہیں کہ جو کچھ بھی ہے، وہ سب میرا ہے اور کہی ہوئی بات کا کوئی اعتبار نہیں ہوتا ہے۔
اس ضمن میں میرے آپ سے کچھ سوالات ہیں:
۱) کیا واقعی اس کاروبار سے بنے ہوئے مال و جائیداد میں میرا آدھا حصہ ہے یا نہیں؟ جبکہ خاندان کے کئی لوگ گواہ ہیں کہ بھائی سب کے سامنے یہ کہا کرتا تھا کہ جو کچھ بھی اس کاروبار سے بنا ہے، وہ ہم دونوں کا آدھا آدھا ہے۔
۲) کیا بھائی کی یہ بات صحیح ہے کہ کہی ہوئی بات کا کوئی اعتبار نہیں ہوتا ہے؟
۳) بھائی نے ایک گھر مجھے ملکیتاً تصرف، قبضہ اور کاغذات کے ساتھ دیا تھا، کیا بھائی کا اس کی واپسی کا تقاضہ کرنے سے مجھے یہ واپس کرنا ہوگا؟
۴) بھائی نے یہ کام والد مرحوم کی پگڑی پر لی ہوئی دکان میں شروع کیا تھا اور ابھی تک اسی دکان میں کام ہورہا ہے تو کیا اس پگڑی کی دکان میں والد مرحوم کے دوسرے ورثاء کا بھی حصہ ہوگا؟ کیونکہ دوسرے ورثاء بھائی سے اس دکان کی تقسیم کا بھی مطالبہ کررہے ہیں۔ براہ کرم میرے ان سوالات کے شریعت کی روشنی میں جوابات عنایت فرمادیں۔ جزاک اللہ خیرا

جواب: 1-2) پوچھی گئی صورت میں آپ نے اپنے بھائی کے ساتھ کاروبار میں عملی معاونت کی، جبکہ ان کے ساتھ کوئی معاملہ طے نہیں ہوا تھا، ایسی صورت میں آپ کی محنت معاونت اور تبرع شمار ہوگی، اصولی طور پر محض معاونت کی بناء پر آپ کا بھائی کے کاروبار اور اس سے خریدی گئی جائیداد میں کوئی ملکیتی حصہ نہیں ہے۔
جہاں تک اس بات تعلق ہے کہ بھائی نے زبانی کلامی کہا ہوا تھا کہ کاروبار وغیرہ ہمارا آدھا آدھا ہے، بھائی کو اپنی کہی ہوئی بات پر عمل کرنا چاہیے، لیکن شرعی طور پر محض زبانی کہنے کی وجہ سے دوسرے بھائی کی ملکیت ثابت نہیں ہوگی، کیونکہ اس کی حیثیت ہدیہ (gift) کی ہے اور ہدیہ میں دی گئی چیز کا جب تک اگلے بندے (جس کو ہدیہ دیا جارہا ہو) کو قبضہ اور مالکانہ تصرف کا اختیار نہ دیا جائے، تب تک ملکیت ثابت نہیں ہوتی، لہذا محض زبانی کلامی کہنے کی وجہ سے چھوٹا بھائی کاروبار اور جائیداد میں آدھے حصہ کا مالک نہیں ہوگا، تاہم اب الگ ہونے کے وقت بڑے بھائی کو بطور احسان کچھ حصہ اپنے چھوٹے بھائی کو دینا چاہیے، تاکہ اس کی دل آزاری نہ ہو۔
3) بھائی نے جو گھر آپ کی ملکیت اور قبضہ میں دیدیا تھا، اس پر شرعاً آپ کی ملکیت ثابت ہوجائے گی، اب بڑا بھائی اس کی واپسی آپ سے کا مطالبہ نہیں کر سکتا۔
4) پگڑی کی صورت واضح نہیں ہے، پگڑی پر لینے کی کیا صورت تھی؟ اس وقت کیا معاملہ طے ہوا تھا؟ مکمل وضاحت کے بعد اس کا جواب دیا جائے گا۔