سوال: مفتی صاحب! والدین کے انتقال کے بعد ان کی تدفین اور جنازے کے اخراجات میں کیا بیٹے حصہ ملا سکتے ہیں، مقصد یہ ہے کہ کیا یہ بچوں کی ذمہ داری ہے یا محض ان کی خوشی پر ہے؟

جواب: واضح رہے کہ اگر مرحوم نے ترکہ میں مال چھوڑا ہو تو اس کی تجہیز و تکفین کے اخراجات اس کے ترکہ میں سے لیے جائیں گے، البتہ اس میں اس بات کا لحاظ ضروری ہے کہ اخراجات شرعی طریقے کے مطابق متوسط درجے میں خرچ کیے جائیں، لیکن اگر مرحوم نے ترکہ میں اس قدر مال نہ چھوڑا ہو جس سے یہ اخراجات پورے کیے جاسکیں تو یہ اخراجات اس شخص کے ذمہ ہیں، جس پر مرحوم کا نان و نفقہ واجب تھا۔ اگر ایسے لوگ تعداد میں زیادہ ہوں تو سب پر مشترکہ طور پر ان کے میراث کے حصہ کے بقدر خرچ کرنا لازم ہوگا، یعنی اگر مرحوم ترکہ میں کچھ چھوڑتا تو ہر وارث کو جتنا شرعی حصہ ملتا، اس تناسب سے ہر وارث خرچ کرے گا۔
یہ تفصیل اس صورت میں ہے کہ جب کوئی عاقل بالغ وارث یا کوئی اور شخص مرحوم کی تجہیز و تکفین کے اخراجات برداشت کرنے کے لیے تیار نہ ہو، لیکن اگر کوئی عاقل بالغ وارث یا کوئی اور شخص مرحوم کی تجہیز و تکفین کے اخراجات اپنی خوشی و رضامندی سے برداشت کر لے تو ترکہ سے یہ اخراجات نہیں نکالے جائیں گے۔