سوال: السلام علیکم ورحمۃ اللہ وبرکاتہ! مجھے پوچھنا یہ تھا کہ میں اور میری فیملی 13 دسمبر عمرے کے لیے روانہ ہوئے، نیت کرنے کے بعد جب ہم مکہ پہنچے تو سامان رکھنے کے بعد میری وائف کو حیض آگیا اور ہمیں وہاں مکہ میں چھ دن گزارنے تھے، پھر وہاں سے ہماری مدینے کے لیے روانگی تھی تو میری وائف نے مدینے جا کرغسل کیا اور پھر مدینے سے واپسی پہ جب ہم آرہے تھے تو دوبارہ جب ہم میقات پہنچے، وہاں میری وائف نے دوبارہ عمرے کی نیت کی اور جاتے ہی ہم نے عمرہ ادا کرلیا۔
میرا سوال یہ ہے کہ کیا ہم میری وائف پر دم لازم ہو گیا ہے یا نہیں؟ اس نے مدینے میں جا کے غسل کرنے کے بعد جب مدینے سے واپسی آئے ہیں تو جب عمرہ کیا ہے، اور نیت مدینے سے واپسی کے میقات پر دوبارہ کی تھی، رہنمائی فرمائیے گا کہ اس کے لیے کیا حکم ہے؟
ابھی ہم 27 دسمبر کو پاکستان آچکے ہیں، تھوڑا میں اس کشمکش میں ہوں، میری رہنمائی فرمائیے۔
تنقیح:
1) کیا آپ کی بیوی نے حیض کی حالت میں عمرہ ادا کرلیا تھا یا عمرہ ادا کئے بغیر مدینہ منورہ چلی گئی تھیں اور واپسی پر دوبارہ میقات سے نئے احرام کے ساتھ آئی تھیں؟
2) مدینہ سے واپسی پر نیا احرام باندھا تھا یا پرانے احرام سے ہی عمرہ ادا کیا تھا؟
3) پرانے احرام اور نئے احرام (اگر باندھا تھا تو )کے درمیان کوئی جنایت کی تھی یا نہیں؟
جواب تنقیح:
1) عمرہ ادا نہیں کیا تھا کیونکہ جاتے ہی وہ حالت حیض میں آگئی تھیں، پھر اسی حالت میں مدینہ چلی گئی تھیں، وہاں جا کے انہوں نے غسل کیا اور میقات سے نئے حرم کے ساتھ واپس آئی تھیں۔
2) نیا احرام باندھا تھا کیونکہ پرانا احرام ناپاک ہو چکا تھا۔
3) نہ ہی خوشبو لگائی تھی اور نہ ہی ناخن کاٹے تھے۔
مدینے سے اتے ہی ہوٹل میں سامان رکھ کے فورا عمرہ ادا کرنے گئے اور عمرہ ادا کرلیا تھا۔

جواب: واضح رہے کہ جس عورت کو حالت احرام میں حیض آجائے تو اس کے لیے مسجد حرام جانا، نماز پڑھنا اور طواف کرنا جائز نہیں، البتہ اس دوران وہ اپنے ذکر و اذکار کو جاری رکھ سکتی ہے اور حیض بند ہوجانے کے بعد غسل کرکے عمرہ ادا کرے۔
لہذا پوچھی گئی صورت میں اس عورت نے مدینہ سے واپسی پر جب عمرہ ادا کرلیا اور اس پورے دورانیہ میں اس سے کوئی جنایت بھی نہیں ہوئی ہے تو اس کا عمرہ ادا ہوگیا ہے اور اس پر دم بھی لازم نہیں ہے۔