سوال: السلام علیکم! مفتی صاحب! میں کچھ عرصہ پہلے اس طرح قسم کھا چکا ہوں کہ اگر میں نے فلاں کام کیا تو جب جب میں نکاح کروں یا کوئی اور کروائے میری بیوی کو تین طلاق، پھر مجھے اپنی قسم بھول گئی اور میں اس فعل کا مرتکب ہوگیا۔
کیا اس کے بعد نکاح کی کوئی صورت بچتی ہے؟ مجھے کسی نے بتایا کہ اب آپ کے پاس کوئی صورت نہیں ہے، ہاں یہ کہ تم شافعی فقہ کو اپنا لو تو تمہارا نکاح ہوسکتا ہے، کیونکہ وہاں اس طرح کی قسم سے نکاح سے پہلے طلاق واقع نہیں ہوتی تو کیا میں شافعی مسلک کے مطابق نکاح کرسکتا ہوں؟

جواب: پوچھی گئی صورت میں آپ نے (کلما کی) طلاق کی قسم کھا کر جب اس کی خلاف ورزی کرلی تو آپ حانث ہوگئے یعنی آپ کی قسم ٹوٹ گئی، (اگرچہ بھولے سے توڑی ہو)، لہٰذا اب جب بھی آپ کسی عورت سے نکاح کریں گے تو اس پر طلاقیں واقع ہوجائیں گی۔
تاہم اب نکاح کرنے کی صورت یہ ہے کہ آپ خود کسی لڑکی سے نکاح نہ کریں اور نہ ہی کسی کو اپنے نکاح کے لئے وکیل بنائیں، بلکہ آپ کی اجازت کے بغیر کوئی شخص "فضولی" کی حیثیت سے آپ کا نکاح کرادے اور آپ کی طرف سے ایجاب وقبول کرکے آپ کو اطلاع دے دے کہ میں نے آپ کا نکاح فلاں لڑکی سے کرادیا ہے، تم اس (اپنی بیوی) کے پاس جاسکتے ہو اور آپ اپنی زبان سے کچھ نہ کہیں، بلکہ بالکل خاموش رہیں اور بیوی کے پاس چلے جائیں اور کل مہر یا اس کا کچھ حصہ ادا کردیں یا تحریری اجازت دے دیں، تو ایسی صورت میں آپ کی بیوی پر طلاقیں واقع نہیں ہوں گی اور نکاح درست ہوجائے گا۔
یاد رہے کہ تحریری اجازت دینے یا مہر بھیجنے سے پہلے اگر کسی نے نکاح کی مبارکباد دی تو اس پر خاموشی بھی زبانی اجازت کے حکم میں ہےیعنی طلاق واقع ہوجائےگی، اس لئے اس موقع پر خاموش نہ رہا جائے، بلکہ اگر کوئی نکاح کی مبارکباد دے تو اس کے جواب میں یوں کہے کہ " میں ابھی اس پر غور کررہاہوں"۔
واضح رہے کہ مذکورہ صورت میں "کوئی اور نکاح کرادے" سے مراد اگر یہ تھا کہ کوئی اور شخص میری طرف سے وکیل بن کر میری اجازت اور رضامندی سے نکاح کرادے، تو یہ فضولی کی صورت کو شامل نہیں ہوگا۔
نیز یہ بھی واضح رہے کہ چونکہ اس صورت کا حنفی مذہب میں حل موجود ہے، اس لیے کسی اور مذہب کو اختیار کرنے کی ضرورت نہیں ہے۔