سوال: کیا فرماتے ہیں مفتیان کرام اس مسئلے کے بارے میں کہ ایک شخص نے دوسرے سے کہا کہ میں تمہیں ایک بات بتاتا ہوں لیکن اس شرط پر کہ اگر تم نے کسی کو بتائی تو تم اپنی بیوی کو طلاق دو گے۔ اس نے کہا نہیں طلاق نہیں دوں گا، ہاں البتہ قسم کھاتا ہوں کہ کسی کو نہیں بتاؤں گا۔ اس پر پہلے شخص نے کہا نہیں طلاق ضروری ہے، پھر دوسرے نے کہا چلو ٹھیک ہے، اگر میں نے کسی کو یہ بات بتائی تو میری بیوی کو طلاق ہے۔ اس پر پہلے شخص نے کہا: نہیں! بلکہ اس طرح کہو کہ اگر میں نے آپ کی اجازت کے بغیر یہ بات کسی کو بتائی تو میری بیوی کو طلاق ہے۔ اب پوچھنا یہ ہے کہ اس صورت میں پہلا شخص اگر دوسرے کو اجازت دے دے تو کیا اس صورت میں طلاق واقع ہوگی، کیونکہ پہلے اس نے بغیر اجازت کے طلاق کو معلق کیا تھا؟

جواب: واضح رہے کہ قَسَم کا حکم یہ ہے کہ یہ جب ایک بار منعقد ہوجائے تو اس میں نہ تو کوئی قید لگائی جاسکتی ہے اور نہ اس سے رجوع کیا جاسکتا ہے، اسی طرح اگر طلاق کو کسی شرط پر معلق کردیا جائے تو اس کا حکم بھی قسم والا ہی ہوتا ہے، یعنی اس سے رجوع نہیں کیا جاسکتا اور اس میں کوئی قید بھی نہیں لگائی جاسکتی۔
لہٰذا پوچھی گئی صورت میں مذکورہ شخص نے جب یہ جملہ کہا کہ "قسم کھاتا ہوں کسی کو نہیں بتاؤں گا" اس سے قسم منعقد ہوگئی ہے، اور دوسرا جملہ " چلو ٹھیک ہے اگر میں نے کسی کو یہ بات بتائی تو میری بیوی کو طلاق ہے " اس جملہ سے ایک طلاق کسی کو بتانے کی شرط پر معلق ہوگئی ہے، اور اس کے بعد اجازت سے متعلق جو کلام ہوا وہ لغو ہے، لہٰذا اس شخص پر لازم ہے کہ وہ اپنی قسم کو پورا کرے اور وہ بات کسی کو نہ بتائے، اور اگر یہ شخص وہ بات کسی کو بتا دیتا ہے، اگرچہ بتانے والے کی اجازت کے ساتھ بتائے تو اس شخص کی بیوی پر ایک طلاق واقع ہوجائے گی، اور اس کی قسم ٹوٹ جائے گی، جس کا کفارہ ادا کرنا اس پر لازم ہوگا۔