سوال: میری والدہ محترمہ نومبر میں وفات پاگئی ہیں، ان کو گزشتہ 25 سے 30 سال سے شوگر تھی اور ان کے گردے خراب ہوگئے تھے اور وہ آخری دنوں میں شدید درد اور تکلیف میں مبتلا تھیں۔ ان کو نہ چاہتے ہوئے بھی آخری رات گھر والوں نے ڈائلاسسز کروانے کے لئے راضی کیا اور ڈائلاسسز کے دوران ہی وفات پا گئیں۔ جھے پوچھنا یہ ہے کہ کیا میری پیاری والدہ گردوں اور پھیپھڑوں اور شوگر کی مریض تھیں اور ہر وقت ان کا خون وغیرہ نکالا جاتا تھا اور وہ ڈائلاسسز جو کہ خون کی صفائی ہوتی ہے کہ دوران فوت ہوئیں۔ کیا وہ شہادت کے مرتبہ پر فائز ہوئی ہیں؟

جواب: شوگر ایک موذی ومہلک مرض ہے، ایسا مریض نہایت تکلیف سے گذرتا ہے، چنانچہ اس مرض سے وفات پانے والے کو "شہیدِ اخروى" کہا جا سکتا ہے اور اللہ تعالى کے فضل سے یہ امید رکھی جا سکتی ہے کہ اس کی بیماری کی شدید تکلیف کے بدلے میں اللہ تعالى اس کے ساتھ آخرت میں شہید جیسے اعزاز واکرام کا معاملہ فرمائیں گے۔
واضح رہے کہ فقہائے کرام نے دنیوی احکام کے اعتبار سے شہید کی دو قسمیں بیان فرمائی ہیں:
(1) شہید حقیقی (2) شہید حکمی (اخروى)
شہید حقیقی:
وہ ہے جو اللہ کے دین کی سر بلندی اور اس کے تحفظ کے لیے میدانِ جہاد میں کفار سے مقابلہ کرتے ہوئے جامِ شہادت نوش کرے، اگر ایسا شہید علاج معالجہ کى نوبت سے پہلے دم توڑ دے تو دنیا میں اس پر شہید کے احکام کا اطلاق ہوتا ہے، یعنى اس کو غسل وکفن نہیں دیاجاتا ہے، اسے جنازہ کے بعد انہى کپڑوں میں دفن کیا جاتا ہے جن وہ شہادت کے مرتبے پر فائز ہوا ہے۔
شہید حکمی:
ایسے لوگ جو میدانِ جہاد میں تو شہید نہیں ہوئے، جیسے: طاعون کی وبا میں مرنے والا، پیٹ کی بیماری سے مرنے والا، ایسی عورت جو حالت حمل میں فوت ہوئی ہو، ڈوب کر مرنے والا، کسی موذى مرض میں مرنے والا وغیرہ، احادیث میں متفرق طور پر ان شہداء کو بیان کیا گیا ہے، محدثین نے ایسے افراد کی تعداد چالیس سے زائد بتائی ہے، ایسے افراد کو دنیا میں غسل اور کفن دیا جائے گا، انہیں آنحضرت صلی اللّٰہ علیہ وسلم نے ان کی تکلیف دہ موت پر انہیں یہ بشارت دی ہے کہ آخرت میں ان کو شہادت کا درجہ حاصل ہو گا اور ان کے ساتھ آخرت میں شہیدوں کی طرح اعزاز و اکرام والا معاملہ کیا جائے گا۔
نیز واضح رہے کہ قرآن کریم اور احادیث مبارکہ میں شہید کے جو فضائل بیان کیے گئے ہیں، ان کے سیاق و سباق کے مضامین سے یہ واضح طور پر معلوم ہوتا ہے کہ ان فضائل کا اولین مصداق "شہید حقیقی" ہے اور شہید حقیقی کو بلا حساب و کتاب جنت میں داخل کیا جائے گا۔
البتہ چونکہ "شہید حکمی" کے متعلق احادیث میں صراحت آئی ہے، اس لیے اللہ تعالٰی کے فضل و کرم سے یہی امید رکھنی چاہیے کہ وہ آخرت کے اجر و ثواب کا معاملے میں شہید حقیقی کے ساتھ ہوں گے۔
جہاں تک شہید حکمی کے متعلق بغیر حساب و کتاب کا معاملہ ہے کہ وہ بغیر حساب و کتاب کے جنت میں داخل ہوں گے، اس بارے میں کوئی حتمی بات نہیں کی جاسکتی ہے، کیونکہ یہ معاملہ اللہ تعالیٰ کے فیصلے پر موقوف ہے، وہ جس کو چاہے بغیر حساب و کتاب کے جنت میں داخل فرمائے اور جس سے چاہے حساب و کتاب کا معاملہ فرمائے۔