سوال: مفتی صاحب! میرے زکوة سے متعلق کچھ سوالات ہیں:
1) میری ماہانہ آمدنی تقریباً 2 لاکھ ہے، جس میں 117000 مقررہ تنخواہ اور آمدنی کا ایک اور ذریعہ شامل ہے جس میں جمع مائنس 20000 کا فرق ہے تو کل تقریباً 2 لاکھ ہو جاتا ہے۔ مہینے کے شروع میں میرا بینک بیلنس بڑھ کر 130000 جمع مائنس 20000 ہو جاتا ہے۔ آمدنی کی ادائیگی کے دوسرے ذرائع سے ادائیگی کی تاریخ طے نہیں ہے، لیکن مہینے کے آغاز سے میرا بینک بیلنس بڑھ کر 140k ہو جاتا ہے اور مہینے کے آخر میں تقریباً 20 ہزار جمع مائنس 10 ہزار تک حاصل کرنے کے لیے کافی ہے۔ برائے مہربانی میری آمدنی پر زکوٰۃ کے بارے میں میری رہنمائی کریں۔
2) اگر میں نے رجسٹریشن کے لیے تقریباً 6 لاکھ کے قریب رقم رکھی ہے تو کیا اس پر زکوٰۃ فرض ہوگی؟
3) میرے والد کے پاس ایک پلاٹ ہے جو انہوں نے پیسے بچانے کے لیے ایک طویل مدتی سرمایہ کاری کے طور پر خریدا تھا، لیکن اب اس میں کچھ دکانیں ہیں اور باقاعدہ کرایہ ملتا ہے، ایسے پلاٹ کی زکوٰۃ کا کیا حکم ہے؟
4) والد صاحب کی کوئی آمدنی نہیں ہے، وہ پنشن خرچ پر استعمال کرتے ہیں تو کیا ان کو گھر چلانے کے لیے میری مدد کی ضرورت ہے؟
جزاک اللہ خیرا

جواب: 1) واضح رہے کہ زکوٰۃ کے واجب ہونے کے لیے ماہانہ جمع خرچ اور آمدن یا اخراجات کا اعتبار نہیں ہے، بلکہ وجوب زکوٰۃ کے لیے نصاب اور سال گزرنا شرط ہے، یعنی اموالِ زکوٰۃ (سونا، چاندی، نقد رقم اور مالِ تجارت) میں سے کوئی ایک یا ان میں سے ایک سے زائد کو آپس میں ملاکر اگر ساڑھے باون تولہ چاندی کی مالیت کو پہنچ جائے اور اس پر سال گزر جائے تو اس کی زکوٰۃ واجب ہوتی ہے اور سال گزرنے کا مطلب یہ ہے کہ جس دن آدمی کے پاس نصاب کے بقدر مال جمع ہو جائے اس دن سے چاند کے حساب سے ایک سال بعد بھی وہ نصاب کا مالک ہو، اگرچہ درمیان سال میں نصاب کم زیادہ ہوجائے، کیوں کہ اصل اعتبار سال کے پہلے اور آخری دن کا ہے۔ لہٰذا پوچھی گئی صورت میں آپ کی آمدنی میں سے جو رقم بچ کر سال بھر آپ کے پاس رہے تو صرف اس رقم پر زکوٰۃ واجب ہوگی، بشرطیکہ وہ نصاب کے بقدر ہو۔
2) جی ہاں! اس رقم کی زکوٰۃ آپ کے ذمہ لازم ہوگی، اگر یہ سال مکمل ہونے کے بعد بھی آپ کی ملکیت میں ہو، لیکن اگر سال مکمل ہونے سے پہلے یہ خرچ ہوکر نصاب سے کم رہ جائے تو زکوٰۃ واجب نہیں ہوگی۔
3) آپ کے والد نے چونکہ یہ پلاٹ بیچنے کی نیت سے نہیں خریدا تھا، بلکہ اپنی بنیادی رقم اور کرایہ وغیرہ کے ذریعے سرمایہ کی حفاظت کے لیے خریدا تھا، اس لیے اس پلاٹ کی مالیت پر زکوٰۃ واجب نہیں ہوگی، البتہ اس سے حاصل ہونے والے کرایہ پر زکوٰۃ واجب ہوگی، جبکہ وہ ساڑھے باون تولہ چاندی کی قیمت تک پہنچے اور سال بھی گزر جائے۔
4) اگر آپ کے والد کی آمدن ان کی بنیادی ضروریات کے لیے کافی نہ ہو يا گھر كے اخراجات كی وجہ سے وہ مشکلات کا شکار ہوں تو آپ کے ذمہ ان کا نان ونفقہ واجب ہوگا۔