سوال: مفتی صاحب! اگر کسی کے ہونٹ زیادہ سگریٹ پینے کی وجہ سے کالے ہو چکے ہوں تو کیا وہ اس پر سرخ ٹیٹّو بنوا سکتا ہے، جس سے ہونٹ لال ہو جاتے ہیں اور دیکھنے میں اچھے لگتے ہیں؟

جواب: ہماری معلومات کے مطابق مذکورہ مقصد کے لیے چھوٹی سوئیوں پر مشتمل ایک آلہ کے ذریعے ہونٹوں کو زخمی کر کے اس میں رنگ بھرا جاتا ہے اور یہ وہی طریقہ کار ہے جس کے ذریعہ جسم پر ٹیٹو بنائے جاتے ہیں، چونکہ حدیث مبارکہ میں جسم گدوانے والوں پر لعنت کی گئی ہے، اس لیے زیب و زینت کی غرض سے مذکورہ طریقے سے ہونٹ سرخ کروانا شرعاً ممنوع اور حرام ہے، لہذا اس عمل سے اجتناب کرنا شرعاً لازم ہے۔