سوال: ہمارے یہاں کاروبار میں بہت ساری اسکیم کسٹمر حضرات کو مہیا کی جاتی ہیں، جیسے تین صابن کے پیکٹ پر بیس روپے کی بچت، اسی طریقے سے پتی وغیرہ پر کچھ دیا جاتا ہے، اگر ہم دکان والے اس کو الگ کر کے ریٹیل ریٹ پر بیچیں تو کیا ہمارے لئے ایسا کرنا جائز ہے؟ اسی طرح سے تیل والے یا پتی والے ایک خاص مقدار پر خریدنے پر کھانے کی ٹرے، پلیٹ یا چمچ دیتے ہیں، کیا ہم دکاندار یہ چیزیں اپنے استعمال میں لا سکتے ہیں؟

جواب: پوچھی گئی صورت میں مخصوص خریداری پر گاہک کو کوئی اضافی چیز مفت میں دینا لوگوں کو خریداری پر ابھارنے اور رغبت دلانے کا ذریعہ ہے، اور وہ گاہک کے لیے عطیہ(gift) ہے جو کہ جائز ہے، بشرطیکہ اس انعامی اسکیم کو غیر معیاری اور گھٹیا سامان کی ترویج کا ذریعہ نہ بنایا جائے اور اس سامان کی عام قیمت میں انعام کی وجہ سے اضافہ نہ کیا جائے، نیز ایسی صورت میں گاہک کے لیے اس اسکیم سے فائدہ اٹھانا جائز ہے۔
جہاں تک دکاندار کا وہ اضافی چیز نکالنے کا تعلق ہے تو اس سلسلے میں تفصیل یہ ہے کہ اگر دکاندار اپنے سپلائر/ وینڈر کا وکیل اور ایجنٹ بن کر آگے مال بیچتا ہو تو ایسی صورت میں دکاندار کیلئے اضافی سامان نکالنا امانت میں خیانت اور دھوکہ دہی ہوگی جو کہ جائز نہیں ہے،لیکن اگر دکاندار اپنے سپلائر کا ایجنٹ نہ ہو، بلکہ اس سے مال باقاعدہ خرید کر آگے فروخت کرتا ہو تو اس کا شرعی حکم یہ ہے کہ انسان جب کوئی چیز خرید لیتا ہے تو وہ اس چیز کے تمام منافع کے ساتھ مالک بن جاتا ہے، اس بناء پر وہ اس میں جائز تصرف کرسکتا ہے، بیچنے والا اسے پابند نہیں بناسکتا کہ وہ اپنے استعمال میں نہ لائے۔ اس اصول کی روشنی میں دکاندار کا وہ انعامی سامان نکال لینا ناجائز یا حرام نہیں ہے، البتہ کاروباری اخلاقیات کا تقاضہ یہ ہے کہ دکاندار کو چاہیے کہ اپنے گاہک کو بھی وہ مال انعامی سامان کے ساتھ ہی فروخت کرے، جیسے اس کو اپنے سپلائر سے ملا ہے، تاکہ گاہک اور سپلائر کے درمیان بد اعتمادی کی فضا قائم نہ ہو۔