سوال: حضرت ! میں نے یہ پوچھنا ہے کہ ہمارے لوگوں میں جب کسی کا انتقال ہو جاتا ہے تو لوگ آتے ہیں، بار بار دعا کے لئے ہاتھ اٹھاتے ہیں، کیا اس طرح کرنا جائز ہے؟ کیا یہ بدعت میں شمار تو نہیں ہے؟ رہنمائی فرما دیجئے۔

جواب: واضح رہے کہ تعزیت کے لیے ہر آنے والے کا ہاتھ اٹھا کر مرحوم کے لیے دعا کرنا اور اس کا التزام ( ضروری) کرنا خلاف سنت ہے، البتہ اس کو لازم سمجھے بغیر مرحوم کے لیے مغفرت کی دعا کی جائے یا کبھی ہاتھ اٹھا کر دعا کرلی جائے، تو اس میں کوئی مضائقہ نہیں ہے۔
نیز کسی مسلمان کے انتقال پر میت کے متعلقین سے تعزیت کرنا مسنون ہے اور اس کا طریقہ یہ ہے کہ میت کی تدفین سے پہلے یا تدفین کے بعد میت کے گھر والوں کو تسلی اور دلاسہ دیا جائے، انہیں صبر کی تلقین کی جائے، چونکہ تعزیت کے خاص الفاظ اور مضمون متعین نہیں ہے، لہذا صبر و تسلی کے جو الفاظ بھی زیادہ مناسب معلوم ہوں وہ کہے جاسکتے ہیں، اس سلسلے میں نبی اکرم صلی الله عليہ وسلم سے تعزیت کے جو بہترین کلمات منقول ہیں وہ یہ ہیں:
’’إِنَّ لِلَّهِ مَا أَخَذَ وَلَهُ مَا أَعْطَى وَكُلٌّ عِنْدَهُ بِأَجَلٍ مُسَمًّى‘‘
ترجمہ:
بے شک جو اللہ تعالیٰ نے ہم سے لے لیا ( مرحوم) وہ اسی کی ملکیت تھا اور جو کچھ اس نے عطا فرما رکھا ہے، وہ بھی اسی کا ہے۔
اور ہر چیز کا اللہ تعالیٰ کے ہاں ایک وقت مقرر ہے۔
یا
"أَعْظَمَ اللّٰهُ أَجْرَکَ وَ أَحْسَنَ عَزَائَکَ وَ غَفَرَ لِمَیِّتِکَ".
ترجمہ:
اللہ تعالیٰ آپ کو اس ( سانحہ وفات) پر بڑا اجر عطا فرمائے اور آپ کو بہتر تسلی و صبر عطا فرمائے اور آپ کے مرحوم کی مغفرت فرمائے ۔
ان کلمات میں دعا بھی ہے اور تسلی و صبر کی تلقین بھی ہے۔