سوال:
پوچھنا یہ ہے کہ ایک دفعہ طلاق دی ہوئی ہو تو کیا دوسری دفعہ طلاق بائن دے سکتے ہیں اور اس کے بعد دوبارہ نکاح ہوسکتا ہے یا نہیں؟
جواب: واضح رہے کہ اگر شوہر اپنی بیوی کو طلاق رجعی دینے کے بعد دوران عدت دوسری طلاق بائن دے دے تو اس کی بیوی پر دو طلاقیں بائن واقع ہو جائیں گی اور وہ عورت اس شخص کے نکاح سے نکل جائے گی، اب اگر یہ دونوں آپس میں میاں بیوی کی طرح رہنا چاہیں تو دوبارہ شرعی گواہوں کی موجودگی میں نئے مہر کے ساتھ نکاح کرنا ہوگا، البتہ اگر شوہر عدت گزرنے کے بعد دوسری طلاق دے تو دوسری طلاق واقع نہیں ہوگی، کیونکہ عدت گزرنے پر وہ عورت اس شخص کے نکاح سے نکل جائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الدر المختار مع رد المحتار: (306/3، ط: دار الفكر)
الصريح يلحق الصريح و) يلحق (البائن) بشرط العدة (والبائن يلحق الصريح)
قوله بشرط العدة) هذا الشرط لا بد منه في جميع صور اللحاق، فالأولى تأخيره عنها. اه. ح
واللہ تعالٰی اعلم بالصواب
دارالافتاء الاخلاص،کراچی