سوال: السلام علیکم! آج کل یہ رواج ہو گیا ہے کہ دولہا اور دلہن والے مل کر اجتماعی ضیافت کرتے ہیں، اس میں دولہا والوں کی نیت ولیمے کی ہوتی ہے اور دلہن والوں کی نیت شادی کی ضیافت ہوتی ہے جس کا نام reception یا شلیمہ ہوتا ہے، اس کی شرعی رہنمائی فرما دیجیے۔ ایک بات کی وضاحت کر دوں کہ اس طرح کی دعوت کا عمومی مقصد بچت ہوتا ہے۔

جواب: واضح رہے کہ نکاح کے موقع پر لڑکے اور لڑکی والوں کے لیے باہمی اتفاق و رضامندی سے مل کر اپنے مہمانوں کے لیے اجتماعی ضیافت کا اہتمام کرنا جائز ہے، اور اس سے نفسِ ولیمہ کی سنت ادا ہو جائے گی، البتہ لڑکی والوں کی طرف سے اپنے مہمانوں کے بقدر خرچ برداشت کرنے کی وجہ سے یہ ضیافت ان کے مہمانوں کے حق میں ولیمہ کی دعوت نہیں ہوگی، بلکہ ان کے حق میں یہ محض ایک دعوت ہوگی، لہذا اگر لڑکے والوں کے لیے گنجائش ہو تو مکمل ضیافت کا اہتمام ان کے لیے کرنا بہتر رہے گا تاکہ تمام مہمانوں کے لیے یہ دعوت مسنون ولیمہ کی بابرکت دعوت رہے۔