سوال:
السلام علیکم
مفتی صاحب ! ایک بندہ 27 جولائی کو مکہ مکرمہ پہنچا ہے اور حج کے فورا بعد اس کی مدینہ منورہ روانگی ہے، اب یہ معلوم کرنا ہے کہ یہ مکہ میں مسافر ہوگا یا مقیم ہوگا؟ کیونکہ 8ذوالحجہ کو انہوں نے منٰی چلے جانا ہے۔
جواب: ١- واضح رہے کہ مسافر کے لیے قصریاپوری نماز پڑھنے کا اصول یہ ہے کہ اگر مسافر کسی مقام پر پندرہ دن یااس سے زیادہ مسلسل قیام کی نیت کرے،تو وہ مقیم (وہاں کے رہا ئشی) کے حکم میں ہوگا اور نمازیں پوری پڑھے گا اور اگر ایک مقام پر پندرہ دن سے کم مدت کے قیام کی نیت ہو، توایسا شخص مسافر ہی کے حکم میں ہے ،لہذا وہ قصر کرتا رہے گا۔
دوسری طرف منیٰ اور مکہ کی آبادی اتنی پھیل چکی ہے کہ وہاں کی حکومتی حدبندی اور عرف کے مطابق اب یہ دونوں جگہیں آپس میں متصل ہوگئی ہیں اور منیٰ کو مکہ مکرمہ کا ایک محلہ سمجھا جاتا ہے۔ چنانچہ بہت سے علماء کرام ( جامعہ دارالعلوم کراچی کے مفتیان کرام اور دیگر کئی علماء کرام) کا فتوی یہ ہے کہ سفر کے احکامات کی حد تک یہ مختلف مقامات ایک جگہ کے حکم میں ہیں، لہذا مسافت سفر طے کر کے آنے والے حاجی کے مکہ مکرمہ میں قیام کی مدت بشمول ان ایام کے جو حج کے دنوں میں منیٰ، مزدلفہ اور عرفات میں گزریں گے، اگر پندرہ دن یا اس سے زائد ہو، تو ایسا حاجی مقیم سمجھا جائے گا اور اس پر مقیم کے احکام لاگو ہوں گے، لہذا ان مقامات میں وہ نماز میں اتمام بھی کرے گا۔
اور اگر حاجی کی مدتِ قیام مکہ مکرمہ میں بشمول ان ایام کے جو حج کے دنوں میں منیٰ، مزدلفہ اور عرفات میں گزریں گے، پندرہ دن سے کم ہو، تو وہ مسافر سمجھا جائے گا، اس پر مسافر کے احکام لاگو ہوں گے، لہذا وہ ان مقامات میں نماز پڑھتے ہوئے قصر کرے گا۔
نیز علماء کرام کی ایک کثیر تعداد ( جن جامعہ علوم اسلامیہ بنوری ٹاؤن کے مفتیان کرام بھی شامل ہیں) کا فتوی یہ بھی ہے کہ منیٰ، مزدلفہ، عرفات اور مکہ مکرمہ یہ سب الگ الگ مقامات ہیں، لہذا اگر حاجی کا مدت قیام مکہ مکرمہ میں پندرہ دن یا اس سے زائد ہو تو وہ مقیم ہوگا، لہذا اس پر مقیم کے احکامات لاگو ہوں گے، وہ ان مقامات ( منیٰ، مزدلفہ، عرفات) میں نماز پڑھتے ہوئے اتمام کرے گا۔
اور اگر حاجی کا مکہ مکرمہ میں مدتِ قیام پندرہ دن سے کم ہو، تو وہ مسافر سمجھا جائے گا،
اس پر سفر کے احکام لاگو ہوں گے، لہذا وہ نماز پڑھتے ہوئے قصر کرے گا۔
( نوٹ)
مذکورہ بالا تفصیل میں جن علماء کرام کے فتوے پر اعتماد ہو، اس پر عمل کیا جاسکتا ہے، البتہ دونوں طرف کے علماء کرام کی رائے قابل احترام ہے، لہذا کسی ایک کے خلاف طعن وتشنیع نامناسب ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
عمدۃ القاری: (119/7)
"وقال اکثر اھل العلم منھم عطاء والزھری والثوری والکوفیون وابو حنیفۃ واصحابہ والشافعی واحمد و ابو ثور لایقصر الصلوٰۃ اھل مکۃ بمنیٰ وعرفات اذا کانوا حجاجا اتموا".
الجوھرۃ النیرۃ: (195/1)
"منیٰ وھی قریۃ فیھا ثلث سکک بینھا و بین مکۃ قرسخ وھی من الحرم".
الدر المختار: (126/2)
"بموضعین مستقلین کمکۃ ومنیٰ فلودخل الحاج مکۃ ایام العشر لم تصح نیتہ لأنّہ یخرج الیٰ منیٰ وعرفۃ (الی قولہ ) اوکان احدھما تبعا للاخر بحیث تجب الجمعۃ علیٰ ساکنہ للاتحاد حکما
وفی الشامیۃ تحتہ لانہ لما کان عازماً علی الخروج قبل تمام نصف شہر لم یصرمقیما".
منحۃ الخالق علی البحر: (143/2)
’’إنہ إذا نوی الإقا مۃ بمکۃ شہرًا ومن نیتہ أن یخرج إلی عرفات ومنی قبل أن یمکث بمکۃ خمسۃ عشر یومًا لا یصیر مقیمًا ؛ لأنہ لا یکون ناویًا لإقامۃ مستقلۃ فلا تعتبر ‘‘۔
واللہ تعالٰی اعلم بالصواب
دارالافتاء الاخلاص،کراچی