سوال: مفتی صاحب! میراث کے حوالے سے آپ سے ایک مسئلہ معلوم کرنا چاہتی ہوں، امید ہے کہ شریعت مطہرہ کی روشنی میں جواب دے کر ممنون و مشکور فرمائیں گے۔
(1) مسئلہ یہ ہے کہ ہماری فیملی جس مکان میں رہ رہی تھی، وہ مکان بوسیدہ اور خستہ حال ہونے کی وجہ سے آج سے تقریباً 15 سال پہلے والد صاحب ہی کی زندگی میں دو تین بھائیوں نے مل کر اسے بالکل ہی منہدم کرکے نیا مکان بنا لیا، اب دو سال پہلے والد صاحب وفات کرچکے ہیں تو کیا ان بھائیوں کو میراث تقسیم ہوتے وقت اس تعمیر کی رقم ملے گی؟ یہ بھائی کہہ رہے ہیں کہ ورثاء کو ہم نئی بنی ہوئی جگہ کے حساب سے حصہ نہیں دیں گے، بلکہ پلاٹ کی رقم لگوا کر اس حساب سے باقی ورثاء کو حصہ دیں گے، کیا بھائیوں کا یہ عمل درست ہے؟
(2) ہم پانچ بھائی اور پانچ بہنیں تھیں، جن میں دو بہنیں والد صاحب کی زندگی میں ہی فوت ہوگئی تھیں، اب ہم پانچ بھائی اور تین بہنیں ہیں، ہمارے درمیان وراثت کی تقسیم کس طرح ہوگی؟
(3) جو دو بہنیں والد صاحب سے پہلے فوت ہوچکی ہیں، کیا والد کی میراث میں ان کا حصہ ہے اور اگر حصہ ہے تو ان کا حصہ ان کی اولاد میں کس طرح تقسیم ہوگا؟

جواب: 1) پوچھی گئی صورت میں اگر بیٹوں نے والد صاحب سے قرض یا واپسی کی صراحت کے ساتھ تعمیرات میں رقم لگائی تھی تو ان کو مکان کی تعمیر میں اپنی لگائی ہوئی رقم ملے گی اور اگر والد صاحب سے قرض یا واپسی کی صراحت کے بغیر رقم لگائی تھی تو ان کو تعمیرات میں لگائی ہوئی رقم نہیں ملے گی، بلکہ یہ ان کی طرف سے اپنے والد کے لیے تبرع اور احسان ہوگا، لہذا یہ مکان والد صاحب کی ملکیت شمار کیا جائے گا اور ان کے انتقال کے بعد ان کے تمام شرعی ورثاء میں ان کے حصوں کے بقدر تقسیم کیا جائے گا۔
نیز واضح رہے کہ اگر میراث کئی سالوں بعد تقسیم ہو رہی ہو تو اس میں چیزوں کی قیمت کا تعین موجودہ قیمتوں کے اعتبار سے کیا جائے گا، لہذا تقسیم کے وقت گھر کی موجودہ قیمت لگائی جائے گی۔
2) مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد منقولہ و غیر منقولہ کو تیرہ (13) حصوں میں تقسیم کیا جائے گا، جس میں سے پانچوں بیٹوں میں سے ہر ایک کو دو (2) اور تینوں بیٹیوں میں سے ہر ایک کو ایک (1) حصہ ملے گا۔
فیصد کے اعتبار سے ہر ایک بیٹے کو %15.38 فیصد حصہ اور ہر ایک بیٹی کو %7.69 فیصد حصہ ملے گا۔
3) جن دو بیٹیوں کا انتقال والد صاحب کی زندگی میں ہوگیا تھا، ان بیٹیوں اور ان کی اولاد کا مرحوم کی میراث میں کچھ حصہ نہیں ہے۔