سوال:
حضرت جی! میں نے ایک ویڈیو دیکھی ہے، جس میں کہا گیا ہے کہ اگر شوہر سے بیوی طلاق لینا چاہتی ہے اور شوہر طلاق نہیں دے رہا ہے تو بتایا ہے کہ بیوی کسی قاضی کے پاس جا کے خلع لے سکتی ہے ، اور اگر شوہر تب بھی طلاق نہ دے تو وہ قاضی یعنی عالم یا مفتی خود اس لڑکی کو شوہر کو بول کے خلع دلوا سکتا ہے، کیا یہ بات صحیح ہے؟ اس کا سارا مسئلہ پورے حوالے کے ساتھ بتائیں۔
جواب: واضح رہے کہ اگر میاں بیوی میں نباہ نہیں ہو رہا ہو، اور نفرت اس قدر بڑھ گئی ہو کہ ان کا اکٹھے رہنا ممکن نہیں ہوتو اللہ تعالیٰ کی حدود قائم کرنے کے لیے وہ علیحدگی اختیار کرسکتے ہیں، یہ علیحدگی دو صورتوں میں ہو سکتی ہے: ایک یہ کہ شوہر اپنی خوشی سے طلاق دیدے اور دوسرا یہ کہ بیوی کچھ لین دین کر کے شوہر سے طلاق کا مطالبہ کرے، اگر شوہر اس کے لیے تیار نہیں ہو تو بیوی کچھ لین دین کر کے شوہر کو طلاق کے لیے راضی کر لے، پس اگر بیوی کے مطالبہ پر شوہر طلاق دینے پر راضی ہو جائے، اس کو شریعت میں خلع کہا جاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
القرآن الکریم: (البقرة، الایة: 229)
فَاِنْ خِفْتُمْ اَلاَّ يُقِيْمَا حُدُوْدَ اﷲِ فَلاَ جُنَاحَ عَلَيْهِمَا فِيْمَا افْتَدَتْ بِه....الخ
صحیح البخاری: (رقم الحدیث: 4971، 2021/5، ط: دار ابن کثير اليمامة)
عَنِ ابْنِ عَبَّاسٍ أَنَّ امْرَأَةَ ثَابِتِ بْنِ قَيْسٍ أَتَتْ النَّبِيَّ فَقَالَتْ يَا رَسُولَ اﷲِ ثَابِتُ بْنُ قَيْسٍ مَا أَعْتِبُ عَلَيْهِ فِي خُلُقٍ وَلَا دِينٍ وَلَکِنِّي أَکْرَهُ الْکُفْرَ فِي الْإِسْلَامِ فَقَالَ رَسُولُ اﷲِ: أَتَرُدِّينَ عَلَيْهِ حَدِيقَتَهُ قَالَتْ نَعَمْ قَالَ رَسُولُ اﷲِ: اقْبَلْ الْحَدِيقَةَ وَطَلِّقْهَا تَطْلِيقَةً
واللہ تعالٰی اعلم بالصواب
دارالافتاء الاخلاص،کراچی