سوال: 1) کاشف اپنے دوست عاصم کو پچاس لاکھ کی رقم دیتا ہے اور اس سے یہ طے کرتا ہے کہ اس کے اوپر آٹھ لاکھ روپے نفع دو گے، کیا یہ صورت جائز ہے؟
2) اگر کاشف جیولرز کی دکان پچاس لاکھ کا سونا خرید کر اپنے دوست عاصم کو دے اور اس سے کہے کہ مجھے اس سونے آٹھ لاکھ کا نفع کما کر دو تو کیا یہ صورت جائز ہے؟ عاصم کہتا ہے کہ اگر یہ مسئلہ جائز ہے تو میں ہر مہینے کاشف کو اٹھاون لاکھ کی ساٹھ قسطیں ادا کروں گا ہر مہینہ کی قسط چھیانوے ہزار سات سو ہوگی۔

جواب: 1) واضح رہے کہ کسی کو ادھار رقم دیکر اس پر اضافی رقم لینا سود کی ایک صورت ہے جو کہ ناجائز اور حرام ہے٬ لہذا پوچھی گئی صورت میں کاشف کا اپنے دوست کو پچاس لاکھ روپے ادھار دے کر اس کے اوپر متعین آٹھ لاکھ روپے اضافی رقم واپس کرنے کی شرط لگانا سود پر مشتمل ہونے کی وجہ سے جائز نہیں ہے، اس سے اجتناب لازم ہے۔
2) سنار سے سونا باقاعدہ خرید کر اسے اپنے قبضہ میں لینے کے بعد باہمی رضامندی سے کسی شخص کو مقررہ مدت کیلئے قسطوں پر فروخت کرنا شرعاً درست ہے، البتہ سونے کو قسطوں پر بیچنے کی صورت میں مارکیٹ ریٹ سے زیادہ قیمت طے کرنا چونکہ سود حاصل کرنے کا حیلہ بن سکتا ہے، اس لیے قسطوں کی وجہ سے اس کی قیمت مارکیٹ ویلیو سے زیادہ قیمت مقرر نہ کی جائے، نیز قسط کی تاخیر کی صورت میں جرمانہ وغیرہ کی شرط بھی نہ لگائی جائے تو پھر یہ معاملہ شرعاً درست ہو گا۔