سوال: مفتی صاحب ! ایک سوال یہ ہے کہ بینک کا کریڈٹ کارڈ بنوا سکتے ہیں؟ اسکی ایک ٹائم لیمیڈ ہوتی ہے کہ 45 یا 50‬ دنوں میں آپ پیسے واپس ادا کردیں تو سود کے زمرے میں نہیں جاتا تو کیا کارڈ بنوا سکتے ہیں ؟
جزاک اللہ

جواب: واضح ہو کہ کریڈٹ کارڈ ہولڈر کا کوئی اکاؤنٹ بینک میں نہیں ہوتا ہے، بلکہ وہ معاہدہ ہی ادھار پر سود دینے کا ہوتا ہے۔ اس معاہدہ میں اگرچہ بینک ایک متعین مدت فراہم کرتا ہے کہ اگر اس متعین مدت کے اندر ادائیگی کردے تو سود نہیں دینا پڑے گا، لیکن اصلاً معاہدہ سود کی بنیاد پر ہوتا ہے اور سود کی ادائیگی کا وعدہ بھی کریڈٹ کارڈ ہولڈر کو کرنا ہوتا ہے۔
اس کے علاوہ اس میں تجدید مدت (Rescheduling) کی سہولت بھی موجود ہوتی ہے، جس سے ادائیگی کی مدت بڑھ جاتی ہے، البتہ اس کے ساتھ ساتھ شرح سود میں اضافہ ہوجاتا ہے اور بعض صورتوں میں اضافی رقم لے جاتی ہے۔
چونکہ اس میں معاہدہ اصلاً سود کی بنیاد پر ہوتا ہے اور جس طرح سود لینا اور دینا منع ہے، اسی طرح سود دینے کا معاہدہ اور وعدہ کرنا بھی منع ہے۔
اس وجہ سے اس کا حکم یہ ہے کہ اس کارڈ کا استعمال جائز نہیں ہے، مگر یہ کہ ڈیبٹ کارڈ، چارج کارڈ یا ادائیگی کا کوئی اور متبادل طریقہ نہ ہو تو کریڈٹ کارڈ کو اس شرط کے ساتھ استعمال کرنے کی گنجائش ہے کہ کارڈ ہولڈر معین وقت سے پہلے پہلے ادائیگی کردے اور کسی بھی وقت سود عائد ہونے کا کوئی بھی امکان باقی نہ رہے۔