سوال: الحمدللہ ! میرے چار بچے ہیں، بچوں کی ماں کی صحت بہت زیادہ کمزور ہوگئی ہے، حالت یہ ہے کہ پانچویں بچے کا سلسلہ شروع ہو گیا ہے، تقریبا بشمول آج دو ہفتے مسلسل ایسے گزرے ہیں، جس میں معالج نے صرف ڈرپ اور او آر ایس کے محلول پر گزارہ کروایا ہے، جسم میں پانی کی مقدار حد سے زیادہ کم ہے، معالج کا کہنا ہے کہ مریضہ کی حالت اس نہج پر ہے، اس ولادت کے ساتھ ہی ساتھ کسی بڑے ہسپتال سے مستقل ضبط ولادت کرالیں، اس بارے میں شریعت کی رہنمائی کا منتظر ہوں۔

جواب: بلا عذر مستقل فیملی پلاننگ کرنا اسلام میں منع ہے یا ایسی صورت اختیار کرنا، جس سے قوت تولید بالکلیہ ختم ھوجائے، مثلاً : رحم (بچہ دانی) نکال دینا یا حتمی نس بندی کرادینا وغیرہ حرام ہے، کیونکہ اس میں اللہ کی پیدا کی ہوئی جسمانی اعضاء میں تخلیقی حیثیت کو بالکلیہ ختم کرنا ہے، جو کہ حرام اور ممنوع ہے۔
یاد رکھیے ! صحت اور بیماری اللہ کی طرف سے ملتی ہے، اس کے حکم کی خلاف ورزی کرنے سے اس زندگی میں بظاہر کچھ راحت ملے گی، مگر آخرت کی تکلیف سخت ہوگی۔
ہاں ! کسی واقعی عذر، بیماری، شدید کمزوری، دوسرے بچے کو خطرہ یا ماں کی جان کو خطرہ ہو تو ایسی صورتوں میں بضرورت ایسی مانع حمل تدبیروں کو اپنانے کی گنجائش ہے، جو وقتی ہوں اور جب چاہیں انہیں ترک کرکے توالد اور تناسل کا سلسلہ جاری کیا جا سکتا ہو۔
چنانچہ مذکورہ عورت کے لیے بچہ دانی نکال دینا یا بالکلیہ بند کروادینا تو جائز نہیں ہے، البتہ اگر آئندہ ولادت کی وجہ سے اپنی جان اور صحت کو خطرہ ہو تو ایسی عارضی احتیاطی تدابیر اختیار کرنا کہ حمل ہی نہ ٹہرے، جائز ہے۔