سوال: السلام علیکم، حضرت ! سوال یہ ہے کہ کچھ لوگ کہتے ہیں کہ بچوں کا نام عمر نہیں رکھنا چاہئے، کیوں کہ اِس نام والے لوگ بہت غصہ والے ہوتے ہیں اور یہ کہ فاطمہ نام کی عورتوں کی زندگی میں بہت مشکلات رہتی ہیں، کیا یہ صحیح ہے؟ اور کیا اِس وجہ سے ان ناموں کو نہیں رکھنا چاہئے؟

جواب: بچے کے نام رکھنے سے متعلق دو باتیں ذہن نشین فرمائیں:
پہلی بات:
اچھا نام رکھنے کو آپ ﷺ نے اولاد کے حقوق میں شمار فرمایا ہے۔ ایک حدیث میں ہے :
عِنِ ابْنِ عَبَّاسٍ رضی اللہ عنہ :أَنَّہُمْ قَالُوْا یَا رَسُوْلَ اللّٰہِ! قَدْ عَلِمْنَا مَا حَقُّ الْوَالِدِ عَلَی الْوَلَدِ فَمَا حَقُّ الْوَلَدِ عَلَی الْوَالِدِ؟قَالَ أَنْ یُحْسِنَ اِسْمَہ‘ وَیُحْسِنَ أَدَبَہ‘۔( شعب الایمان، حدیث نمبر:۸۶۵۸) 
ترجمہ: حضرت ابن عباس رضی اللہ عنہ سے روایت ہے کہ:صحابۂ کرام  رضی  اللہ عنہم نے کہا :اے اللہ کے رسول !ہم نے یہ جان لیا کہ بچہ پر باپ کا کیا حق ہے ،پس (آپ بتائیں کہ) باپ پربچے کاکیا حق ہے؟ توآپ صلی اللہ علیہ و سلم نے فرمایا کہ(باپ پر بچہ کا یہ حق ہے کہ ) اس کااچھا نام رکھے اوراس کوحسن ا دب سے آراستہ کریں۔
ایک اور حدیث میں ہے کہ حضرت ابودرداء رضی اللہ عنہ سے روایت ہے :
اِنَّکُمْ ُتدْعَوْنَ یَوْمَ الْقِیَامَۃِ بِأَسْمَائِکُمْ وَاَسْمَاءِ آبَائِکُمْ فَأَحْسِنُوْا أَسْمَائَکُمْ ۔
ترجمہ:
نبی ﷺ نے فرمایا :کہ تم لوگ قیامت کے دن اپنے باپوں کے نام سے پکارے جاؤگے تو اپنا نام اچھا رکھو۔
(سنن ابی داؤد:2/676،المیزان ،کراچی)
دوسری بات:
اچھے اوربرے نام کااثر
اچھے ناموں کے اچھے اثرات اور برے ناموں کے برے اثرات مرتب ہوتے ہیں ۔چنانچہ ایک روایت میں یہ واقعہ منقول ہے :
عَنْ عَبْدِالْحَمِیْدِ بْنِ جُبَیْرِ بْنِ شَیْبَۃَ قَالَ جَلَسْتُ اِلٰی سَعِیْدِ بْنِ الْمُسَیِّبِ فَحَدَّثَنِیْ أَنَّ جَدَّ ہٗ حَزَنًا قَدِمَ عَلٰی النبی صلی اللہ علیہ و سلم قَالَ مَا اسْمُکَ قَالَ اسْمِیْ حَزَنٌ قَالَ بَلْ اَنْتَ سَھْلٌ قَالَ ھَل اَنَا بِمُغَیِّرٍ اِسْمًا سَمَّانِیْہِ أَبِیْ قَالَ ابْنُ المُسَیِّبِ فَمَا زَالَتْ فِیْنَا الْحَزُوْنَۃُ بَعْدُ۔( ابوداؤد :۲ /۶۷۷، مصنف عبد الرزاق :۱۱/۴۱ ،السنن الکبرٰی :۹/۵۱۶ بخاری: ۲/۹۱۴ )
ترجمہ:حضرت عبد الحمید ابن جبیر ابن شیبہ کہتے کہ (ایک دن ) میں حضرت سعید ابن المسیب کی خدمت میں حاضر تھا کہ انہوں نے مجھ سے یہ حدیث بیان کی کہ میرے دادا جن کا نام حزن تھا نبی کریم صلی اللہ علیہ و سلم  کی خدمت میں حاضر ہوئے تو آپ صلی اللہ علیہ و سلم نے پو چھا تمہارا نام کیا ہے؟ انہوں نے کہا میرانام حزن ( جس کے معنٰی ہیں سخت اور دشوار گزارزمین) ہے۔ آپﷺ نے فرمایا کہ: (حزن کوئی اچھا نام نہیں ہے ) بلکہ میں تمہارا نام سہل ( اس کے معنی ہیں ملا ئم اور ہموار زمین، جہاں آدمی کو آرام ملے) رکھتا ہوں ۔ میرے دادا نے کہا کہ میرے باپ نے میرا جو نام رکھا  ہے اب میں اس کو بدل نہیں سکتا ۔حضرت سعید ؓ نے فر ما یا کہ: اس کے بعد سے ہمارے خاندان میں ہمیشہ سختی رہی۔
اس سے اتنی بات واضح ہو گئی کہ کبھی ناموں کے اچھے ،برے اثرات مسمٰی پر مرتب ہوتے ہیں ؛ لہٰذااچھے ناموں کا انتخاب کرنا چاہئےاوربرے ناموں سے احترازکرنا چاہئے لیکن " عمر اور فاطمہ "برے نام نہیں ہیں، بلکہ اچھے اور بابرکت نام ہیں۔
اگر ان ناموں کے برے اثرات زندگی پر پڑتے تو حضور صلی الله عليه وسلم اپنی چہیتی بیٹی کا نام فاطمہ نہیں رکھتے اورحضرت عمر کو بھی اپنا نام رکھنے سے منع فرماتے، حضور صلی اللہ علیہ وسلم کا ان ناموں کے رکھنے سے منع نہ فرمانا، اس بات کی دلیل ہے کہ ان ناموں کے برے اثرات زندگی پر مرتب نہیں ہوتے ہیں۔