سوال: حضرت ! سوال یہ ہے کہ کیا عثمان نام کا مطلب نعوذباللہ چھوٹا سانپ ہے اور کیا یہ نام رکھنا صحیح ہے؟

جواب: واضح رہے کہ عربی زبان ایک وسیع زبان ہے اور بسااوقات ایک ہی لفظ کے کئی معانی آتے ہیں، لہذا کسی بھی لفظ کا معنی کرتے وقت موقع و محل کی مناسبت سے معنی کیا جائے۔ بعض لوگوں نے عثمان کا معنى "اژدھا" مشہور کردیا، جبکہ یہ لفظ عثمان کا صحیح معنى نہیں ہے، ہاں! یہ ضرور ہے کہ اژدہا کو بھی عثمان کہا جاتا ہے،کیونکہ اس میں عثم کے معنوں میں سے ایک معنى پایا جاتا ہے ۔
ابن فارس مقاییس اللغۃمیں کہتے ہیں:
ترجمہ: عین , ثاء , میم : یہ صحیح اصل ہے جو کہ کسی بھی چیز میں سختی اور مضبوطی پر دلالت کرتی ہے ۔ (اہل عرب) کہتے ہیں "العیثوم" یعنی ہر چیز میں سے شدید موٹا یا سخت ۔ اور ہاتھی کو بھی عیثوم کہا جاتا ہے ..... خلیل (لغوی) کہتے ہیں اسی وجہ سے عثمان نام رکھا گیا ہے , کیونکہ یہ "جبر" سے مأخوذ ہے ۔
ابن منظور لسان العرب میں لکھتے ہیں : ترجمہ :عثم : العثم: کہتے ہیں زخم کے درست طور پر ٹھیک نہ ہونے کو , کہ اس میں کوئی نقص باقی رہ جائے۔ کہا جاتا ہے " عَثَمَ العظمُ يَعْثِمُ عَثْماً وعَثِمَ عَثَماً، فَهُوَ عَثِمٌ" جب وہ ہڈی درست طور سے نہ بھرے اور اس میں کمزوری رہ جائے ۔اور وہ سیدھی نہ ہو ۔..... اور عیثوم ہر چیز میں سے سخت یا موٹی چیز کو کہتے ہیں ۔...... اور جب سانپوں میں سے کسی کو عثمان کہا جائے تو وہ اژدہا ہوتا ہے ۔ اور عثمان اژدہا کے بچہ کو بھی کہتے ہیں ۔اور کہا گیا ہے کہ ہر قسم کے سانپ کے بچہ کو بھی کہا جاتا ہے۔ اور اژدہا کی کنیت ابو عثمان ہے ۔ اور کہا جاتا ہے" خذ ہذا فاعتثم" یعنی اسے پکڑ اور اس سے مدد حاصل کر ۔اور ابن الفرج کہتے ہیں کہ میں نے قیس قبیلہ کے بہت سے لوگوں کو یہ کہتے ہوئے سنا " فُلَانٌ يَعْثِمُ ويَعْثِنُ"یعنی وہ کام میں اجتہاد یعنی سخت محنت و کوشش کرتا ہے , اور اپنے آپ کو اس میں تھکا دیتا ہے ۔اور عثمان اژدہا کے بچہ کو بھی کہتے ہیں۔