سوال: السلام علیکم، پوچھنا یہ تھا کہ اسٹیٹ ایجنسی کا کام حلال ہے یا حرام؟ ایک ساتھی کہہ رہے تھے کہ جس کاروبار میں آپ کا پیسہ شامل نہ ہو، وہ حرام ہے۔

جواب: واضح رہے جس طرح مالی سرمایہ لگا کر کاروبار کرنا جائز ہے، اسی طرح کسی جائز کام میں اپنی سروسز(خدمات) فراہم کر کے اس پر اجرت لینا بھی جائز ہے، لہذا اسٹیٹ ایجنسی (یعنی جائیداد و زمین کی خریدوفروخت) کا کام کرنا جائز ہے، اور اس پر کمیشن (اجرت) لینا درج ذیل شرائط کے ساتھ جائز ہے:
۱- جس کام کے عوض کمیشن لیا جا رہا ہو، وہ کام فی نفسہ جائز ہو۔
۲- وہ کام بھی متعین ہو۔
۳- ایجنٹ اپنی خدمات واقعی صرف بھی کرے۔
۴- کمیشن لینے والا وہ جائیداد اپنے لیے خرید و فروخت نہ کر رہا ہو۔
۵- کمیشن (اجرت) جانبین کے درمیان باہمی رضامندی کے ساتھ، بلا کسی ابہام کے پہلے سے طے ہونی چاہیے(خواہ وہ متعین مقدار کی صورت میں ہو یا فیصدی تناسب کی صورت میں)۔
مذکورہ بالا شرائط کا لحاظ کرتے ہوئے "اسٹیٹ ایجنسی" کا کاروبار کرنا جائز ہے۔