سوال: عید میلادالنبی ﷺ منانے کے بارے میں شرعا کیا حکم ہے؟ تفصیل سے بتا دیں۔

جواب: نبی کریم ﷺ کا ذکر مبارک کرنا ، چاہے وہ آپ ﷺکی ولادت باسعادت کا تذکرہ ہو ، آپ ﷺ کے لباس و پوشاک وغیرہ  کو یاد کرنا ہو یا آپ ﷺ کی نشست و برخاست، چلنے پھرنے، کھانے پینے یا دیگر احوال کو بیان کرنا ہو، یہ تمام کام موجب رحمت و باعث برکت ہیں، اس میں کسی مسلمان کے لیے  ذرا سا شبہ کرنے کی بھی گنجائش نہیں، لیکن مروّجہ یوم ولادتِ رسول ﷺکو مخصوص طریقہ سے بطورِعیدمنانا صحابہ کرام رضی اللہ عنہم ، تابعین اور تبع تابعین کے دور  میں موجود نہیں تھا،  اور نہ ہی کسی شرعی دلیل سے ثابت ہے، بلکہ یہ  رسم کئی مفاسد پر مشتمل ہے۔ اس مجلس کے انعقاد اور اس میں شرکت کو لازم سمجھا جاتا ہے، اگر کوئی شخص اس میں شریک نہ ہو تو اسے لعن طعن کیا جاتا ہے، مخصوص تاریخ میں میلاد کے انعقاد کا اہتمام کیا جاتا ہے، اس محفل کے آخر میں قیام کرنے کو ایک ضروری عمل سمجھا جاتا ہے، جس میں یہ اعتقاد رکھا جاتا ہے کہ نبی کریم ﷺ ہماری اس مجلس میں شریک ہوئے ہیں، ان مجالس میں عموما موضوع (منگھڑت) روایات بیان کی جاتی ہیں، رات دیر تک محفل رہتی ہے، جس کی وجہ سے فجر کی نماز متاثر ہوتی ہے اور اہل محلہ بھی پریشان ہوتے ہیں، ان مجلسوں کے منعقد کرنے میں بے حد اسراف اور فضول خرچی کی جاتی ہے، ان خرابیوں کی بنا پر مروجہ طریقے سے میلاد منانا شرعا درست نہیں، اس سے بچنا ضروری ہے۔