سوال: السلام علیکم، مفتی صاحب! میرا ایک مستقل گھر صوبہ سرحد میں ہے، اور ایک گھر کرائے کا میں نے کراچی میں لیا ہوا ہے، کام کے سلسلے میں مجھے وہاں رہنا پڑتا ہے، اب اگر کراچی میں مجھے پندرہ دن سے کم رہنے کا ارادہ ہو، تو میں نماز قصر کروں یا پوری نماز پڑھوں؟

جواب: کراچی آپ کا وطن اقامت ہے، جب تک آپ کا کراچی میں رہنے کا ارادہ ہے، اور وہاں رہنے کے لیے کرائے کا مکان لے رکھا ہے، اس وقت تک آپ کراچی آتے ہی مقیم ہو جائیں گے، اور آپ کے لیے پندرہ دن یہاں رہنے کی نیت کرنا ضروری نہیں ہوگا، اس صورت میں آپ یہاں پوری نماز پڑھیں گے، اور جب آپ کراچی کی سکونت ختم کر کے یہاں سے اپنا سامان منتقل کر لیں گے، اور کرائے کا مکان بھی چھوڑ دیں گے اس وقت کراچی آپ کا وطن اقامت نہیں رہے گا، پھر اگر کبھی کراچی آنا ہوگا تو اگر پندرہ دن ٹھہرنے کی نیت ہوگی، تو آپ یہاں مقیم ہوں گے، اور اگر پندرہ دن سے کم ٹھہرنے کی نیت ہوگی تو مسافر ہوں گے، خلاصہ یہ ہے کہ جب تک آپ کا کرایہ کا مکان ہے، اور جب تک یہاں آپ کا سامان رکھا ہے، اور آپ کی نیت یہ ہے کہ آپ کو واپس آکر یہاں رہنا ہے، اس وقت تک یہ آپ کا وطن اقامت ہے۔