سوال: بعض حضرات کو دیکھا ہے کہ پانی کے موجود ہونے کے باوجود وہ تیمم کر کے نماز پڑھ لیتے ہیں، کیا اس طرح پانی کی موجودگی میں تیمم کرنا جائز ہے؟

جواب: واضح رہے کہ پانی کی موجودگی میں بغیر کسی شرعی عذر کے تیمم کرنا جائز نہیں ہے، البتہ اگر پانی موجود ہو، مگر استعمال کرنے والے کا غالب گمان ہو کہ اگر وہ پانی استعمال کرے گا تو بیمار پڑ جائے گا یا اس کی بیماری میں مزید اضافہ ہوگا یا بیماری ٹھیک ہونے میں دیر لگے گی تو ان تمام صورتوں میں اس کے لیے تیمم کرنا جائز ہے، اسی طرح سخت سردی کی وجہ سے جنبی شخص کو اس بات کا خوف ہو کہ اگر وہ ٹھنڈے پانی سے غسل کرے گا تو اس کی جان چلی جائے گی یا اس کا کوئی عضو تلف ہوجائے گا یا بیمار ہوجائے گا تو ایسے شخص کے لیے بھی تیمم کرنا جائز ہے، بشرطیکہ پانی گرم کرنے کا کوئی انتظام نہ ہو۔