سوال: میرا سوال یہ ہے کہ سالگرہ کی تقریب میں جانا کیسا ہے اور سالگرہ کا كھانا كھانے کا حکم کیا ہے؟

جواب: زندگی ایک عظیم نعمت اور عطیہ خداوندی ہے، اس کا صحیح استعمال انسان کے درجات کو بلند کرتا ہے اور اسےضائع کرنا انسان کو ہلاک کرتا ہے۔ قیامت میں انسان کو اپنے ہر قول و عمل کا اللہ سبحانہ و تعالیٰ کے سامنے پورا حساب دینا ہے، اس لیے ضروری ہے کہ انسان ہر عمل کو کرنے سے پہلے اس بات کی بخوبی سوچ بچار کرے کہ اس عمل کے ارتکاب کی صورت میں وہ کیا صفائی پیش کرے گا؟ آج مسلمانوں نے دیگر اقوام کی دیکھا دیکھی بہت سی چیزیں اپنی زندگی میں لازم و ضروری قرار دے رکھی ہیں، انہیں میں سے "سالانہ یومِ پیدائش" (Birth day) کی رسم بھی ہے۔
واضح رہے کہ سالگرہ غیر مسلموں کا طریقہ اور مغربی ثقافت کی دین ہے، جس کی دین اسلام میں کوئی گنجائش نہیں ہے۔ نبی کریم ﷺ نے غیروں کی مشابہت سے اجتناب کا حکم دیا ہے، جبکہ سالگرہ منانا، کیک کاٹنا، سالگرہ کی مبارک باد دینایاسالگرہ کی تقریب میں جانا غیر اسلامی قوموں کی ثقافت اور طرز عمل ہے، اس لیے ایسے رسم ورواج سے بچنا چاہیے، تاہم کیک اور دیگر اشیاء کا کھانا اگر حلال آمدنی سے ہو تو اس کو حرام نہیں کہا جائے گا۔