سوال: مفتی صاحب ! میں نے سنا ہے کہ بدعت کی دو قسمیں ہیں، براہ مہربانی اس کی وضاحت فرمادیں۔

جواب: بدعت کی دوقسمیں ہیں: (١)بدعت حسنہ (٢)بدعت سیئة
بدعت حسنہ: وہ نیا کام جو شرعی اصول اور دلائل کے خلاف نہ ہو اور اسے دین کی حفاظت اورتقویت کے لیے سرانجام دیاجائے، یہ "بدعت حسنہ" کہلاتی ہے جوکہ مذموم نہیں ہے، جیسے: رسول اللہ ﷺ کےزمانہ میں مدرسہ عمارت کی شکل میں نہ تھا، صرف ایک چبوترہ تھا، اب عمارت اور کمروں والا مدرسہ ایک نیا کام ہے، لیکن بہتر کام ہے اور اسی اصل کام یعنی دینی علم کے حصول، تقویت اور حفاظت کے لیے ہے۔ اس کو لغوی اعتبار سے عربی میں "بدعت حسنہ" کہتے ہیں، یعنی "نیا اچھا کام"۔ اسی طرح اس کی مثال قرآن مجید پر اعراب لگانا اور فصل و وصل وغیرہ کی علامات لکھنا،حدیث و فقہ کی تدوین کا کام کرنا، ضرورت کی بنا پر مختلف زبانوں میں دینی موضوعات پر کتابوں کی تصنیف و اشاعت اور مدارس میں نصاب کا قیام وغیرہ کرنا ہے، یہ سب "بدعت حسنہ" کے قبیل سے ہیں۔
بدعت سیئة : ہر اس عمل کو کہتے ہیں جس کی اصل قرآن و سنت سے ثابت نہ ہو، اور وہ حضور اکرم ﷺ، صحابہ کرامؓ اور تابعینؒ کے زمانے میں باوجود داعیہ اور محرک ہونے کے نہ پایا جاتا ہو اور نہ ہی اس پر قولاً، فعلاً، صراحتاً یا اشارتاً کسی طرح بھی شارع کی طرف سے اجازت موجود ہو، اور اسے دین اور ثواب کا کام سمجھ کر اختیار کیا جائے، جیسے: قبر پر اذان دینا وغیرہ۔
نوٹ: واضح رہے کہ شرعی اصطلاح کے اعتبار سے بدعت سے مراد صرف "بدعت سیئہ" ہی ہے اور یہی وہ بدعت ہے جس کی مذمت حدیث میں بیان کی گئی ہے اور اسے دین میں اپنی طرف سے اضافہ اور بڑا گناہ قرار دیا گیا ہے، جبکہ "بدعت حسنہ" کو صرف لغت کے اعتبار سے بدعت کہا جاتا ہے، ورنہ درحقیقت اس کا شمار بدعت اصطلاحی میں نہیں ہوتا ہے۔