سوال: السلام علیکم، مفتی صاحب ! میں اکثر نماز کے لیے جاتے ہوئے لوگوں سے کہہ دیتا ہوں کہ چلو نماز کے لیے، مگر مجھے کسی نے کہا کہ آپ ایسا نہ کریں، کیونکہ اگر وہ آپ کے بلانے پر نہ آیا، تو اس نے اللہ کے حکم کا انکار کیا، جب کہ اللہ کے حکم کا انکار کفر ہے، بلکہ آپ ایسے کہا کریں کہ میں نماز کے لیے جا رہا ہوں۔ برائے کرم رہنمائی فرمائیں!

جواب: اگر کوئی شخص نماز کے لیے جاتے ہوئے آس پاس کے لوگوں کو نماز کے لیے بلاتا ہے کہ "چلو نماز پڑھنے کے لیے " اس میں شرعاً کوئی حرج نہیں ہے۔
حدیث شریف میں ہے کہ
عن مسلم بن ابي بكرة، عن ابيه، قال: خرجت مع النبي صلى الله عليه وسلم لصلاة الصبح" فكان لا يمر برجل إلا ناداه بالصلاة او حركه برجله".
ترجمہ:
مسلم بن ابوبکرہ رضی اللہ عنہ اپنے والد سے روایت نقل فرماتے ہیں کہ انھوں نے فرمایا: میں نبی اکرم ﷺکے ساتھ فجر کے لیے نکلا، تو آپ جس آدمی کے پاس سے بھی گزرتے اسے نماز کے لیے آواز دیتے یا پیر سے ہلا کر جگاتے جاتے تھے۔ (كتاب التطوع، باب الاِضْطِجَاعِ بَعْدَهَا:حدیث نمبر: 1264)
ایک اور روایت میں ہے کہ
عن انس بن مالك ان رسول الله صلى الله عليه وسلم كان يمر بباب فاطمة ستة اشهر إذا خرج إلى صلاة الفجر، يقول: الصلاة يا اهل البيت: إنما يريد الله ليذهب عنكم الرجس اهل البيت ويطهركم تطهيرا (سورة الاحزاب آية 33). 
ترجمہ:
انس بن مالک رضی الله عنہ کہتے ہیں کہ رسول اللہ صلی اللہ علیہ وسلم فاطمہ رضی الله عنہا کے دروازے کے سامنے سے چھ مہینے تک گزرتے رہے، جب فجر کے لیے نکلتے تو آپ کا معمول تھا کہ آپ آواز دیتے «الصلاة يا أهل البيت» ”اے میرے گھر والو! نماز فجر کے لیے اٹھو“ «إنما يريد الله ليذهب عنكم الرجس أهل البيت ويطهركم تطهيرا»”اللہ چاہتا ہے کہ تمہاری نجاست تم سے دور کر دے اور تمہیں پورے طور پر پاک کر دے“۔
(سنن الترمذي، أبواب تفسیر القرآن، باب ومن سورۃ الأحزاب،حدیث نمبر: 3206)
نیز واضح رہے کہ نماز پڑھنے سے انکار کرنا، اس سے کفر لازم نہیں آتا، البتہ اگر کوئی شخص نماز کے وجوب اور فرضیت کا انکار کر دے، تو ایسی صورت میں انسان کافر ہو جائے گا۔