سوال: ١) کیا بیت الخلاء میں کموڈ لگاتے وقت یہ خیال رکھنا ضروری ہے کہ جسم کا اگلا یا پچھلا حصہ قبلہ رخ نہ ہو؟ کیا شریعت میں ایسا کوئی حکم موجود ہے یا لوگ دنیاوی اعتبار سے آداب قبلہ کا خیال رکھتے ہوئے ایسا کرتے ہیں؟ اگر ایسا کوئی حکم موجود ہے تو کموڈ لگاتے وقت جسم كے کون سی طرف قبلہ رخ نہیں ہونا چاہیے؟
٢) اگر قبلہ ڈی اسکیل پر70 اور 80 ڈگری پر ہو، اور کموڈ 90 ڈگری پر نصب کیا جائے تو کیا ایسا کرنے سے گناہ کے مرتکب ہونگے؟

جواب: (١)واضح رہے کہ احادیث رسول ﷺ میں قضائے حاجت کے دوران چہرہ یا پشت قبلہ کی جانب کرنے کی ممانعت آئی ہے، چنانچہ صحیح مسلم میں رسول اللہﷺ کا ارشاد ہے:
" قضائے حاجت کے دوران اپنا چہرہ یا پشت قبلہ کی جانب مت کیا کرو "(صحيح مسلم،حدیث نمبر: 264)
اس حدیث سے معلوم ہوا کہ واش روم میں کموڈ اس طرح نصب کرناضروری ہے کہ قضائے حاجت کے وقت چہرہ یا پشت قبلہ کی جانب نہ ہو۔
(٢)واضح رہے کہ کموڈ کا اگلا اور پچھلا رخ قبلہ کی جانب سے دوسری جانب پھیرنا ضروری ہے، البتہ اگر کموڈ کے دونوں رخ خاص قبلے کی سمت ( Direction) سے دائیں یا بائیں جانب کم ازکم پینتالیس (45) ڈگری سے زیادہ پھیر لیے جائیں تو ایسا کرنا بھی صحیح ہے۔